२००७ देखि २०२२ भित्र फेसबुक चलाएकालाई ७२५ मिलियन डलर वितरण सुरु, एकजनाको हिस्सामा कति?

किशोर पन्थी

---

प्रकाशित मिति : भाद्र २६, २०८२ शुक्रबार

Photo by Alexander Schimmeck

फेसबुकले प्रयोगकर्ताहरुलाई डेटा गोपनीयता मुद्दाको सम्झौताबाट भुक्तानीको रकम पठाउन सुरु गरेको छ । २ बर्ष अगाडि फेसबुकले प्रयोगकर्ताहरूलाई कम्पनीसँग सम्बन्धित क्लास एक्शन मुद्दामा अलर्ट गर्दै सूचनाहरू पठाएको थियो । यो क्याम्ब्रिज एनालिटिका डाटा गोपनीयता घोटालामा कम्पनीको संलग्नतासँग सम्बन्धित छ। यसबारेको सम्झौतामा फेसबुकले प्रयोगकर्ताहरुलाई ७२५ मिलियन डलर तिर्ने सहमति गरेको थियो ।

हरेक प्रयोगकर्ताहरुले औषतमा ३० डलर पाउने र बढीमा ३८ डलरसम्म पाउने बताइएको छ । लामो समय फेसबुक चलाएकाहरुले बढी रकम पाउनेछन् भने कम अवधि चलाएकाहरुले कम रकम पाउनेछन् । आगामी १० हप्ताभित्र उक्त रकम वितरण गरिने भएको छ ।

हालका र पूर्व फेसबुक प्रयोगकर्ताहरूको समूहले फेसबुकको विरुद्धमा धेरै मुद्दा दायर गरेका थिए, जुन अहिले मेटा भनेर चिनिन्छ । कम्पनीले डाटा माइनिङ फर्म क्याम्ब्रिज एनालिटिका र अन्य तेस्रो पक्षहरूसँग निजी प्रयोगकर्ता डाटा साझेदारी गरेको मुद्दा हाल्नेहरुको दाबी थियो । फेसबुकले प्रयोगकर्ताको डाटामा पहुँच गर्ने तेस्रो पक्षहरूमा यसको नियमहरू पर्याप्त रूपमा अनुगमन र लागू नगरेको पनि मुद्दा हाल्नेहरुको दावी थियो ।

सन् २०१८ मा फेसबुकले क्याम्ब्रिज एनालिटिकाबाट ८७ मिलियन फेसबुक प्रयोगकर्ताहरूको विवरण संकलन गरिएको बताएको थियो । त्यो डाटा २०१६ को राष्ट्रपति चुनावमा हेरफेर गर्न प्रयोग भएको आरोप लगाइएको थियो ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

कुनै दायित्व वा गल्तीलाई अस्वीकार गर्ने मेटा डिसेम्बर २०२२ मा अदालत बाहिर यी दावीहरू समाधान गर्न ७२५ मिलियन डलर तिर्न सहमत भएको थियो । २००७ देखि २०२२ सम्मको कुनै पनि अवधिको कुनै समय अमेरिकामा भएका फेसबुक प्रयोगकर्ताहरुले ७२५ मिलियन डलरमध्येको आफूले पाउने हिस्सा दावी गर्नका लागि २ बर्ष अगाडि फेसबुकले सूचित गरेकोमा अहिले रकम पठाउन सुरु गरेको हो । रकम पाउनका लागि २००७ र २०२२ को बीचमा कुनै पनि समयमा फेसबुक एकाउन्ट खोलेको, चलाएको र २ बर्ष अगाडि आफ्नो हिस्सा दावी गरेको हुनुपर्छ ।

प्रयोगकर्ताहरूले सन् २०२३ को अगस्त २५ भित्र अनलाइनमाफर्त रकम दावी गरेका थिए । त्यसका लागि प्रयोगकर्ताले आफ्नो नाम, ठेगाना, इमेल, युजर आईडी र रकम प्राप्त गर्ने माध्यम अनलाइनमा भरेका थिए । युजर आईडीको साटो आफूले फेसबुक लगइन गर्ने इमेल वा फोन नम्बर पनि प्रयोग गर्न सकिने व्यवस्था रहेको थियो । अब योग्य प्रयोगकर्ताहरुले मास्टर कार्ड, पेपल, भेन्मो र जेल लगायतमा माध्मबाट रकम प्राप्त गर्न सक्छन् । सन् २००७ देखि २०२२ भित्रको अवधिमा कुनै समय अमेरिकामा बसेका र यो अवधिको कुनै समयमा फेसबुक चलाएकाहरुले रकम दावी गर्नसक्ने प्रावधान थियो ।