भोकले चिच्याउँदै गाजा : मानवीय संकटबीच इजरायली सेनाको यु-टर्न, राहत प्रवेश सुरु
प्रकाशित मिति : श्रावण ११, २०८२ आईतबार
इजरायली सेनाले आइतबार गाजाका केही क्षेत्रमा सैन्य गतिविधि रोक्ने घोषणा गरेको छ । यसले महिनौंदेखि भोकमरीको चपेटामा परेका लाखौं प्यालेस्टिनीहरूका लागि राहतको आशा जगाएको छ।
गाजा क्षेत्रमा भइरहेको मानवीय संकटका कारण विश्वभर आलोचना बढेपछि इजरायलले यो निर्णय गरेको हो। संयुक्त राष्ट्रसंघको विश्व खाद्य कार्यक्रम अनुसार गाजाका झण्डै एक तिहाई मानिसहरूले दिनौंसम्म खाना पाएका छैनन्।
इजरायली सेनाले बिहान १० बजेदेखि बेलुका ८ बजेसम्म गाजाका तीन क्षेत्रमा सैन्य गतिविधि रोकेर संयुक्त राष्ट्रसंघका राहत ट्रकहरूलाई सुरक्षित रूपमा प्रवेश गर्न दिने जनाएको छ। साथै, युएन राहत सामग्रीहरूका लागि स्थायी मार्ग समेत निर्धारण गरिने बताइएको छ।
पछिल्लो २४ घण्टामा मात्रै कुपोषणका कारण दुई बालबालिकासहित ६ जनाको मृत्यु भएको गाजाको स्वास्थ्य मन्त्रालयले जनाएको छ। योसँगै पछिल्लो एक महिनामा भोक र कुपोषणका कारण मृत्यु हुनेको संख्या ५० नाघिसकेको छ।
मानवीय सहायता संस्थाहरूले इजरायलको यो कदमलाई स्वागत गरेका छन्। तर उनीहरू भन्छन् – ‘स्थायी युद्धविरामबिना गाजाको भोकमरी अन्त्य असम्भव छ।’
यसअघि पनि इजरायलले ‘ट्याक्टिकल पज’ घोषणा गरेको भए पनि अपेक्षित प्रभाव देखिएको थिएन। अहिले राहत केन्द्रहरूमा पनि अराजकता फैलिएको छ, जहाँ सयौं भोकाएका मानिसहरू राहत सामग्री लुट्न भिड्ने गरेका छन्।
संयुक्त राष्ट्रसंघका अधिकारीहरू भन्छन् – ‘इजरायलले सहायता समन्वयमा अनेक प्रशासनिक अवरोध खडा गर्दै आएको छ।’
इजरायली सेनाले गाजामा हवाईमार्गबाट राहत सामग्री फालेको दाबी गरे पनि संयुक्त राष्ट्रसंघले यसलाई “खर्चिलो र अप्रभावकारी” बताएको छ।
युद्ध सुरु भएदेखि हालसम्म करिब ६०,००० मानिस मारिइसकेको गाजाको स्वास्थ्य मन्त्रालयले जनाएको छ, जसमा हजारौं बालबालिका पनि छन्।
यो युद्ध सन् २०२३ अक्टोबर ७ मा हमासले इजरायलमा हमला गरी १,२०० जनाको हत्या र २५० जनालाई अपहरण गरेपछि सुरु भएको हो।
अमेरिकी राष्ट्रपति डोनाल्ड ट्रम्पले युद्ध अन्त्यको आवश्यकता औंल्याए पनि इजरायली प्रधानमन्त्री नेतान्याहूमाथि तत्काल युद्ध रोक्न विशेष दबाब दिएका छैनन्।
गाजा अझै पनि मानवीय संकटको केन्द्रमा छ, जहाँ भोक, भय र बन्दुकको छायाँमा लाखौं मानिसहरू बाँच्न संघर्ष गरिरहेका छन्।