अमेरिकाद्वारा ब्राजिलको सर्वोच्च अदालतका न्यायाधीशको भिसा रद्द
प्रकाशित मिति : श्रावण ३, २०८२ शनिबार
अमेरिकाले ब्राजिलको सर्वोच्च अदालतका आठजना न्यायाधीशको भिसा रद्द गरेको छ । विदेशमन्त्री मार्को रुबियोले ब्राजिलका आठजना सर्वोच्च अदालतका न्यायाधीशहरूको अमेरिकी भिसा रद्द गरेको बताइएको छ ।
यो कदम अमेरिकी प्रशासनले ब्राजिलका पूर्वराष्ट्रपति जाइर बोल्सोनारोलाई सैनिक ‘कू’ प्रयाससम्बन्धी मुद्दाबाट बचाउन थालेको हस्तक्षेपको भागको रूपमा देखिएको छ ।
सन् २०२२ को निर्वाचनमा वामपन्थी उम्मेदवार लुइज इनासियो लुला दा सिल्भासँग हारपछि बोल्सोनारोले सत्ता कब्जा गर्न हिंसात्मक योजना बनाएको आरोप लागेको छ ।
उनीमाथि अहिले अदालतमा मुद्दा चलिरहेको छ । उनी दोषी ठहरिएमा ४३ वर्षसम्मको जेल सजाय हुन सक्छ । ४ जुलाईमा ब्राजिलीय संघीय प्रहरीले बोल्सोनारोको घरमा छापा मारी उनलाई इलोक्ट्रोनिक ट्र्याकिङ ट्याग लगाएको थियो ।
जसपछि रुबियोले एक्स मा लेख्दै बोल्सोनारोमाथिको अनुसन्धानलाई “राजनीतिक खिचातानी”को संज्ञा दिँदै अनुसन्धानकर्ता न्यायाधीश अलेक्सान्द्रे डि मोराएस तथा उनका अदालतका सहयोगीहरूको भिसा रद्द गरिएको घोषणा गरेका थिए ।
भिसा रद्द गरिएका अन्य न्यायाधीशहरूमा लुइस रोबर्टो बारोसो, जोसे एन्टोनियो डियास टोफोली, क्रिस्टियानो जानिन, फ्लाभियो डिनो, कार्मेन लुसिया, लुइज एड्सन फाचिन र गिलमार मेंडेसको नाम त्यहाका सञ्चार माध्यमहरुले उल्लेख गरेका छन ।
बोल्सोनारोका कार्यकालमा नियुक्त गरिएका तीन न्यायाधीशहरू आन्द्रे मेंडोन्सा, कासियो नुनेस मार्क्वेस र लुइज फुक्सले भने प्रतिबन्धबाट छुट पाएको बताइएको छ ।
राष्ट्रपति लुलाले अमेरिकाको यो कदमलाई “अनैतिक र आधारहीन हस्तक्षेप” भन्दै कडा आलोचना गरेका छन्।
९ जुलाईमा ट्रम्पले ब्राजिलबाट आउने सम्पूर्ण वस्तुहरूमा ५० प्रतिशत भन्सार लागु गर्ने घोषणा गरेका थिए । यसले ब्राजिलमा राष्ट्रवादी आक्रोश फैलाएको छ । लुलाले उक्त कदमलाई “स्वीकार्य नभएको ब्ल्याकमेल” भनेका छन्।
यस व्यापारिक युद्धको असर बोल्सोनारो समर्थक क्षेत्रहरू विशेष गरी साओ पाउलोमा कफी उत्पादक र पशुपालन व्यवसायमा पर्नेछ ।
बोल्सोनारोका सांसद छोरा एडुआर्डोले रुबियोको निर्णयलाई समर्थन गर्दै “स्वतन्त्र अभिव्यक्तिको पक्षमा गरिएको यो लडाइँका लागि धन्यवाद । हामी समान मूल्यमा विश्वास गर्छौं ” भनेका छन ।
उनी फेब्रुअरीदेखि अमेरिका बस्दै आएका छन् । आफ्ना पिताको मुद्दामा अमेरिकी अधिकारीहरूलाई मनाउन लागिरहेका छन् ।
बोल्सोनारो पक्षले ट्रम्पको हस्तक्षेपलाई स्वागत गरे पनि व्यापार करको निर्णयले उनीहरूको आधार क्षेत्रमै नकारात्मक असर पारेको विश्लेषकहरूले बताएका छन्।
अमेरिकी ट्रम्प प्रशासनको हस्तक्षेप, भिसा प्रतिबन्ध र व्यापारिक दबाबले ब्राजिलको राजनीतिमा विवादास्पद मोड ल्याएको छ ।
बोल्सोनारोको रक्षामा देखिएको यो अमेरिकी समर्थनले अन्तर्राष्ट्रिय कूटनीतिक सम्बन्धमा गम्भीर प्रश्न उठाएको विश्लेषकहरुले बताएका छन ।