अमेरिकाले डिपोर्ट गरेका तेस्रो देशका आप्रवासी लिन नाइजेरियाद्वारा अस्वीकार
प्रकाशित मिति : असार २८, २०८२ शनिबार
अमेरिकाले डिपोर्ट गरेका तेस्रो देशका आप्रवासीलाई नाइजेरियाले लिन अस्वीकार गरेको छ । नाइजेरियाको सरकारले अमेरिकाबाट निष्कासित तेस्रो देशका आप्रवासी नागरिकलाई लिनुपर्ने ट्रम्प प्रशासनको प्रस्तावलाई कडा रूपमा अस्वीकार गरेको हो ।
अमेरिकाले अन्य तेस्रो देशहरूबाट निष्कासित आप्रवासीहरूलाई अफ्रिकी देशहरूले लिनुपर्छ भन्ने दवाव दिदै आएको छ। नाइजेरियाका विदेशमन्त्री युसुफ टुग्गरले अमेरिकाले केही अफ्रिकी देशहरूलाई अन्य मुलुकका निष्कासित आप्रवासीहरू लिन दबाब दिइरहेको बताए ।
नाइजेरिया आफै समस्यामा रहेको बेला अन्यदेशका आप्रवासी स्वीकार गर्ने संभावना नै रहेको उनले स्पष्ट पारेका छन । हामी आफै अप्ठारोमा छौ , तिमीहरुलाई कसरी सहयोग गर्न सक्छौ भनेर उनले भनेका छन ।
यो टिप्पणी ट्रम्प प्रशासनले आप्रवासीहरूलाई निष्कासन गर्न थालेपछि आएको सबैभन्दा ठूला अस्वीकारमध्ये एक हो । अमेरिकाले तेस्रो मुलुकका आप्रवासीहरूलाई लिन अस्वीकार गर्ने देशहरूलाई भिसा प्रतिबन्ध र व्यापारिक शुल्कको धम्की दिइरहेको छ।
हालसम्म अमेरिकाले दक्षिण सुडानमा म्यानमार, लाओस, भियतनाम, क्युबा र मेक्सिकोका आठ व्यक्तिहरूलाई निष्कासित गरिसकेको छ। यी व्यक्तिहरूलाई मे महिनामा पूर्वी अफ्रिकाको ड्जिबुटीस्थित सैनिक अड्डामा राखिएको थियो । उनीहरुलाई गत साता मात्रै दक्षिण सुडान पठाइएको हो।
मे महिनामा रुवाण्डाका विदेशमन्त्री ओलिभिए न्दुहुङ्गिरेहेले अमेरिकासँग प्रारम्भिक वार्ता भइरहेको बताएका थिए। अमेरिकाले बेनिन, इस्वातिनी र लिबियालाई पनि सो प्रस्ताव गरेको बताइएको छ । तर लिबियाका दुवै सरकार ले यसलाई अस्वीकार गरेका छन्।
यसै हप्ता अमेरिकी विदेश मन्त्रालयले नाइजेरिया, इथियोपिया र क्यामरुनका नागरिकहरूलाई दिइने नन इमिग्रेन्ट भिसामा कडा प्रतिबन्ध लगाएको छ ।
अब ती देशका नागरिकहरूलाई दिइने भिसाहरू केवल ३ महिनाका लागि र एकपटक मात्रै प्रयोग गर्न मिल्ने हुनेछन्। नाइजेरियाले यसमा आपत्ति जनाउँदै यो प्रतिबन्ध पारस्परिक नभई अमेरिकाको आप्रवासन दबाबसँग सम्बन्धित रहेको बताएको छ।
नाइजेरियाले भने अमेरिकासँग खनिज, तेल र ग्याससम्बन्धी नयाँ सम्झौता गर्न तयार रहेको बताएको छ । तर सार्वभौमिकतामा सम्झौता नगर्ने उसले स्पष्ट पारेको छ।