‘भोकमरीमा परेका मानिसहरूको चिहान’मा परिणत भइरहेको छ गाजा !
प्रकाशित मिति : असार २८, २०८२ शनिबार
संयुक्त राष्ट्र राहत तथा कार्य एजेन्सी (यूएनआरडब्ल्यूए)का प्रमुख फिलिप लाजारिनीले गाजा पट्टी अहिले बालबालिका र भोकमरीमा परेका मानिसहरूको चिहानजस्तै बनेको भन्दै गम्भीर चिन्ता व्यक्त गरेका छन्।
शनिबार सामाजिक सञ्जाल एक्समा लेख्दै लाजारिनीले इजरायली सरकारले गाजामा ‘क्रूर र म्याकियाभेलियाली योजना’ लागू गरिरहेको आरोप लगाए।
उनका अनुसार, गाजाबाट बाहिर निस्कने कुनै उपाय नभएकाले स्थानीयहरू भोकमरी वा बमबारी-दुवै मृत्युका विकल्पहरूमध्ये एक रोज्न बाध्य छन्। “यो सबैभन्दा क्रूर र योजनाबद्ध हत्या हो,” उनले लेखे।
गाजाको सरकारी तथ्यांक अनुसार, मे २७ यता अमेरिका र इजरायल समर्थित जीएचएफ (गाजा मानवीय फाउन्डेसन) द्वारा सञ्चालित खाद्य वितरण केन्द्रहरूमा सहायता लिन पुगेका बेला कम्तीमा ८०० प्यालेस्टिनी नागरिक मारिएका छन् भने ५,१०१ जना घाइते भएका छन्।
लाजारिनीको भनाइ अल–जजिराको पछिल्लो प्रतिवेदनपछि आएको हो, जसमा उल्लेख छ कि इजरायली सेनाले देइर अल–बलाह शहरमा पोषण सहायता प्राप्त गर्न लाइनमा रहेका ९ बालबालिका र ४ महिलासहित १५ जनाको गोली हानी हत्या गरेको थियो।
संयुक्त राष्ट्र मानव अधिकार कार्यालयका प्रवक्ता रविना शमदासानीले मेदेखि जुलाई ७ सम्म गाजामा सहायता केन्द्रनजिकै भएका आक्रमणहरूमा ७९८ जना मारिएको पुष्टि गरेकी छन्।
अमेरिकी ठेकेदारहरू र जीएचएफमा कार्यरत केहीले सहायता लिन आएका निहत्था नागरिकहरूमाथि गोली चलाइएको स्वीकार गरेका छन्।
यसैबीच, विश्व खाद्य कार्यक्रमका उपकार्यकारी निर्देशक कार्ल स्काउले गाजाको स्थिति हालसम्मकै सबैभन्दा भयावह रहेको बताएका छन्।
गाजाको आफ्नो चौथो भ्रमणबाट फर्किएका स्काउका अनुसार डब्लुएफपीसँग गाजाको सम्पूर्ण जनसंख्यालाई दुई महिना खुवाउन पर्याप्त खाद्यान्न भए पनि सहायता पुग्ने ट्रकहरूलाई इजरायली पक्षले गन्तव्यमा जान अवरोध गरिरहेको छ।
लाजारिनीले अन्त्यमा भने, “गाजामा पूर्ण दण्डहीनता कायम छ। मानवीय मूल्य र अन्तर्राष्ट्रिय मान्यताहरूलाई गाडिएको छ। अकर्मण्यता बढेमा स्थिति झनै भयावह बन्नेछ। अब पनि चुप लाग्ने हो भने हामी सबैले यस इतिहासको साझा दोष वहन गर्नु पर्नेछ।”