तलब वृद्धिको सहमतिपछि फिलाडेल्फिया सहरका हजारौं कामदारहरू काममा फर्किए
प्रकाशित मिति : असार २७, २०८२ शुक्रबार
अमेरिकाको फिलाडेल्फिया सहरका हजारौं कामदारहरूको हडताल सकिएको छ । एक साताभन्दा बढी समयसम्म चलेको सहरका कर्मचारीहरूको हडताल अन्ततः टुंगिएको हो ।
सहर र कर्मचारी युनियनबीच तलब र सुविधासम्बन्धी सम्झौता भएपछि यो सहमति भएको हो। हडतालले नगरको घर घरको फोहोर संकलन लगायतका सेवा ठप्प बनाएको थियो ।
डिस्ट्रिक्ट काउन्सिल ३३ अन्तर्गत करिब १० हजार श्रमिकहरू हडतालमा रहेका थिए । फोहोर संकलक, डिस्प्याचर र पानी विभागका कर्मचारी आन्दोलित थिए ।
जुलाई १ देखि उनीहरुले काम छोडेका थिए । उनीहरूले वार्षिक ५ प्रतिशत तलब वृद्धिको माग राखेका थिए ।
अगामी तीन वर्षसम्म हरेक वर्ष ३ प्रतिशत तलब वृद्धि हुने छ। झन्डै आधा कर्मचारीहरूलाई २ प्रतिशत थप वृद्धि हुनेछ भने नयाँ तलब स्तर थपिएर आउने छ ।
सम्झौता अवधि सकिँदासम्म अधिकांश कर्मचारीहरू नयाँ स्तरमा पुग्ने सहमति पत्रमा उल्लेख गरिएको छ । फिलाडेल्फियाकी मेयर चेरल पार्करले कर्मचारीहरूमा गरिएको यो ठूलो लगानी हो भन्दै शहरले आफ्नो आर्थिक सीमा पनि ध्यानमा राखेको बताइन ।
उनले पूल, पुस्तकालय, खेलकुद केन्द्रहरू जस्ता सेवा सामान्य अवस्थामा फर्कन केही समय लाग्न सक्ने भएकाले ‘धैर्यता’ राख्न जनतासँग अनुरोध पनि गरेकी छन । फोहोर संकलन भने सोमबारदेखि पुनः सुरु हुने मेयरले जानकारी दिइन्।
डिस्ट्रिक्ट काउन्सिल ३३ फिलाडेल्फियाका चार ठूला कर्मचारी युनियनमध्ये सबैभन्दा ठूलो हो । श्रमिकहरूको औसत वार्षिक तलब ४६ हजार अमेरिकी डलर रहेको जनाइएको छ।
गत वर्ष मेयर पार्करले पद सम्हालेपछि सबै युनियनका कर्मचारीलाई एकैचोटि ५ प्रतिशत तलब वृद्धि गरेकी थिइन्। यो सम्झौतासहित उनको कार्यकालमा डिस्ट्रिक्ट काउन्सिल ३३ कर्मचारीहरूले जम्मा १४ प्रतिशत तलब वृद्धि पाउनेछन्।
यो सम्झौताले फिलाडेल्फियामा दैनिक जनजीवन सामान्य बनाउने अपेक्षा गरिएको छ।