हमासले भन्यो – ‘गाजामा इजरायली सेना रहँदासम्म युद्धविराम सम्भव छैन’
प्रकाशित मिति : असार २६, २०८२ बिहीबार
प्यालेस्टिनी सशस्त्र समूह हमासले गाजामा इजरायली सेनाको भारी उपस्थिति रहँदासम्म कुनै पनि युद्धविराम सम्झौता सम्भव नहुने स्पष्ट पारेको छ।
हमासले सन् २०२३ को अक्टोबर ७ मा इजरायलमा गरेको आक्रमणमा संलग्न १० जनालाई रिहा गर्न तयार भएको जनाएको छ।
कतारको राजधानी दोहामा आइतबारदेखि अमेरिका, कतार र इजिप्टको मध्यस्थतामा हमास र इजरायली वार्ता टोलीबीच अप्रत्यक्ष वार्ता चलिरहेको छ। यसैबीच अमेरिकी अधिकारीहरूले आगामी दिनमा करिब ६० दिनसम्मको अस्थायी युद्धविराम हुने आशा व्यक्त गरेका छन्।
तर हमासले गाजामा मानवीय सहायता स्वतन्त्र रूपमा प्रवाह हुनुका साथै इजरायली सैन्य गतिविधिको पूर्ण अन्त्य हुनुपर्ने स्पष्ट सन्देश दिएको छ। समूहका अनुसार स्थायी शान्तिको लागि यही नै ‘वास्तविक सुनिश्चय’ हो।
हमासका वरिष्ठ नेता बासेम नइमले बिहीबार एएफपीसँग भने, “हामी हाम्रो भूमिमाथि निरन्तर कब्जा रहने अवस्था स्वीकार गर्न सक्दैनौँ। इजरायली नियन्त्रणमा रहेका क्षेत्रहरूमा हामी आत्मसमर्पण गर्न बाध्य हुन्छौँ भन्ने प्रस्तावलाई अस्वीकार गर्छौं।”
उनले दोहामा जारी वार्ताको हालको चरणमा यही विषयमा केन्द्रित भएर हमासको वार्ता टोलीले आफ्नो अडान राखिरहेको जानकारी दिए।
नइमका अनुसार हमासले दक्षिणी गाजाको राफा क्षेत्र तथा खान युनिस र राफाबीचको मोराग करिडोर क्षेत्रमा इजरायली नियन्त्रणको तीव्र विरोध जनाएको छ।
उनले अमेरिका र इजरायल समर्थित समूहहरूद्वारा हाल दिइँदै आएको सीमित सहयोग कार्यक्रम बन्द गर्ने प्रयास भइरहेको दाबी गरे।
यसैबीच बिहीबार मध्य गाजाको देइर अल–बलाहस्थित एक स्वास्थ्य केन्द्रमा भएको इजरायली आक्रमणमा परी आठ बालबालिकासहित १७ जनाको ज्यान गएको नागरिक सुरक्षा विभागले जनाएको छ।