ह्वाइट हाउसमा आज अमेरिकी राष्ट्रपति ट्रम्पलाई भेट्दै इजरायली प्रधानमन्त्री नेतन्याहू
प्रकाशित मिति : असार २३, २०८२ सोमबार
इजरायली प्रधानमन्त्री बेन्जामिन नेतन्याहूले सोमबार अमेरिकी राष्ट्रपति डोनाल्ड ट्रम्पसँग ह्वाइट हाउसमा भेटवार्ता गर्दै छन् । यो भेटवार्तामा अमेरिकी मध्यस्थतामा भइरहेको गाजा युद्धविराम र बन्धक मुक्तिको प्रस्तावबारे विस्तृत छलफल हुने बताइएको छ ।
कतारको राजधानी दोहामा इजरायल र हमासबीच अप्रत्यक्ष वार्ताको दोस्रो दिन पनि जारी रहँदा, क्षेत्रीय कूटनीतिक गतिविधिहरू थप सक्रिय बनेका छन्।
यो नेतन्याहूको ट्रम्प सत्तामा फर्किएपछि तेस्रोपटक वाशिङ्टन भ्रमण हो। गत महिना राष्ट्रपति ट्रम्पले इरानमा हवाई आक्रमणको आदेश दिएका थिए, जसपछि १२ दिने इजरायल(इरान युद्धमा युद्धविराम भएको थियो। अहिले इजरायलले आशा गरेको छ कि इरानसँगको भिडन्तले क्षेत्रीय कूटनीतिक अवसरहरू पनि सिर्जना गर्नेछ।
इजरायली मन्त्री तथा नेतन्याहूको सुरक्षा मन्त्रिपरिषद्का सदस्य आवी डिक्टरका अनुसार, ट्रम्प र नेतन्याहूको छलफल केवल गाजासम्म सीमित नहुने, बरु लेबनान, सिरिया र साउदी अरेबियासँग सम्बन्ध सामान्यीकरणसमेतको सम्भावना समेट्नेछ।
उनले इजरायली सार्वजनिक प्रसारणकर्ता (कान) लाई भने, “हामीले विगतमा प्रयोग गर्दै आएको तर अहिले सार्थक बनेको शब्दमा केन्द्रित हुने छ — नयाँ मध्यपूर्व।”
इजरायल र हमासबीच कतारको मध्यस्थतामा दोहामा अप्रत्यक्ष वार्ताको दोस्रो दिन सोमबार सम्पन्न भएको छ। कतार र इजिप्टको सहकार्यमा भइरहेको वार्तालाई एक इजरायली अधिकारीले “सकारात्मक वातावरण” भएको बताए।
प्यालेस्टिनी अधिकारीहरूले भने आइतबारका प्रारम्भिक बैठकहरू निष्कर्षविहीन भएको बताएका छन्। एक अर्का इजरायली अधिकारीले मानवीय सहयोगबारे पनि छलफल भएको खुलाएका छन्।
अमेरिकाले प्रस्ताव गरेको योजना अनुसार, ६० दिने युद्धविराम लागू हुने, त्यसक्रममा चरणबद्ध बन्धक रिहाइ हुने, इजरायली सेना गाजाका केही क्षेत्रबाट फिर्ता हुने र युद्ध पूर्णतः अन्त्यबारे छलफल हुने उल्लेख छ।
हमासले सबै बन्धक मुक्तिपछि मात्र युद्धविराम गर्ने अडान लिएको छ भने, इजरायलले सबै बन्धक नछुटेसम्म र हमास विघटन नहुँदासम्म युद्ध रोक्ने पक्षमा छैन।
राष्ट्रपति ट्रम्पले शुक्रबार पत्रकारहरूसँग भनेका थिए, “हमासले अमेरिकी प्रस्तावमा सकारात्मक प्रतिक्रिया दिएको छ। मलाई विश्वास छ — सम्झौता यसै साता हुनसक्छ।”
भ्रमणअघि नेतन्याहूले पत्रकारहरूलाई भने, “म राष्ट्रपति ट्रम्पलाई इरानी आणविक स्थलमा गरिएका अमेरिकी हवाई आक्रमणको लागि धन्यवाद दिनेछु। साथै, हाम्रो वार्ताकार टोली दोहामा गाजासम्बन्धी सहमति नजिक पुर्याउने प्रयासमा छ।”
२१ महिनादेखि जारी युद्धले इजरायली जनतालाई थकित बनाएको छ। प्रधानमन्त्री नेतन्याहूका केही कठोरपन्थी गठबन्धन साझेदारहरूले युद्धविरामको विरोध गरे पनि, जनदबाबका कारण सरकार अहिले युद्ध रोक्ने पक्षमा आउने सम्भावना छ।
गाजा युद्ध अक्टोबर २०२३ मा हमासले दक्षिण इजरायलमा आक्रमण गरी १,२०० जनाको हत्या र २५१ जनालाई बन्धक बनाएपछि सुरु भएको थियो। हालसम्म गाजामा करिब ५० बन्धक छन्, जसमध्ये २० जनालाई जीवित मानिन्छ।
इजरायली जवाफी हमलामा गाजामा ५७,००० भन्दा बढी प्यालेस्टिनी मारिएको गाजाको स्वास्थ्य मन्त्रालयले जनाएको छ। संयुक्त राष्ट्रसंघको अनुसार, गाजाको अधिकांश जनसंख्या विस्थापित भइसकेको छ र करिब ५ लाख मानिस केही महिनाभित्रै दुर्भिक्षको जोखिममा छन्।