प्रधानमन्त्री शिनावात्राको राजीनामा माग गर्दै बैंककमा विशाल प्रदर्शन
प्रकाशित मिति : असार १५, २०८२ आईतबार
थाइल्यान्डको राजधानी बैंककमा हजारौँ प्रदर्शनकारीहरू सडकमा उत्रिएका छन्।
उनीहरूले कम्बोडियाका पूर्व प्रधानमन्त्री हुन सेनसँगको टेलिफोन वार्ताको अडियो सार्वजनिक भएपछि प्रधानमन्त्री पैटोंगटर्न शिनावात्राको राजीनामा माग गरेका छन्।
यो प्रदर्शन सन् २०२३ मा फिउ थाई पार्टी सत्तामा आएपछिकै सबैभन्दा ठूलो मानिएको छ। सार्वजनिक भएको अडियोमा प्रधानमन्त्री पैटोंगटर्नले हुन सेनलाई “काका” भनेर सम्बोधन गरेकी छन्।
उनले सीमा विवाद समाधान गरिरहेका थाई सैन्य कमाण्डरलाई “कूल देखिन चाहने” र “कुनै उपयोगी कुरा नगरेको” भन्दै आलोचना गरेकी थिइन्। यस अडियोले थाई जनमानसमा ठूलो आक्रोश फैलाएको छ।
उक्त वार्ता सार्वजनिक भएपछि पैटोंगटर्न नेतृत्वको सत्तारुढ गठबन्धनको एक प्रमुख साझेदारले सरकार छोडेको छ। प्रधानमन्त्रीले यस विषयमा माफी मागेकी छन्, तर उक्त फोनवार्तालाई “कूटनीतिक रणनीति” भनेर बचाउ गरेकी छन्।
उत्तरी थाइल्यान्डको बाढी प्रभावित क्षेत्रको भ्रमण अघि पत्रकारहरूसँग कुरा गर्दै प्रधानमन्त्री पैटोंगटर्नले “शान्तिपूर्ण रूपमा प्रदर्शन गर्नु जनताको अधिकार हो” भन्नुभएको छ।
भीषण वर्षाका बाबजुद हजारौँ प्रदर्शनकारीहरूले बैंककको भिक्टोरी मन्युमेन्ट वरपरका सडकहरू अवरुद्ध गरेका थिए। उनीहरूले थाई झन्डा फहराउँदै “प्रधानमन्त्री राष्ट्रकी शत्रु हुन्” भन्ने नारासहितका प्लेकार्ड बोकेका थिए।
पर्नथेपका अनुसार धेरै थाई नागरिकहरूले प्रधानमन्त्री र उनका पिता थाक्सिन शिनावात्रालाई हुन सेनले चलाएको महसुस गरिरहेका छन्। पैटोंगटर्नले अबदेखि हुन सेनसँग भविष्यमा कुनै पनि फोनवार्ता नगर्ने बताएकी छन्।
३८ वर्षीया पैटोंगटर्न शिनावात्रा, अपदस्थ पूर्व प्रधानमन्त्री थाक्सिन शिनावात्राकी छोरी हुन्। थाक्सिन १५ वर्षको निर्वासनपछि गत अगस्टमा थाइल्यान्ड फर्किएका थिए। पैटोंगटर्नले १० महिनाअघि मात्रै पदभार सम्हालेकी हुन् र उनी देशकी दोस्रो महिला प्रधानमन्त्री हुन्।
यो विवाद गत मे महिनामा एक कम्बोडियाली सैनिक थाई सीमामा मारिएपछि चुलिएको हो। यसले दुई देशबीचको सम्बन्ध लगभग एक दशक यताकै न्यूनतम बिन्दुमा पुर्याएको छ।
दुवै देशले एकअर्कामा आयात–निर्यातमा प्रतिबन्ध लगाएका छन्। कम्बोडियाले थाई खानपान, बिजुली, टेलिभिजन र चलचित्रहरूमा प्रतिबन्ध लगाएको छ।
तर, तीव्र राजनीतिक तनावका बाबजुद शिनावात्रा परिवार र हुन सेन परिवारबीचको मित्रता दशकौँ पुरानो छ। हुन सेन र थाक्सिन शिनावात्रा एकअर्कालाई “धार्मिक दाजुभाइ” भनेर सम्बोधन गर्ने गर्छन्।