युद्धविरामपछि इरानी सर्वोच्च नेता खामेनीको पहिलो सम्बोधन, अमेरिकालाई दिए चेतावनी
प्रकाशित मिति : असार १२, २०८२ बिहीबार
इरानी सर्वोच्च नेता आयातोल्लाह अली खामेनीले बिहीबार टेलिभिजनमार्फत सम्बोधन गर्दै अमेरिकालाई कडा चेतावनी दिएका छन्। उनले भने, “यदि अमेरिकाले पुनः इरानमाथि आक्रमण गर्यो भने, इरानले मध्यपूर्वमा रहेका अमेरिकी सैन्य अड्डाहरूलाई लक्षित गरी प्रतिघात गर्नेछ।”
यो खामेनीको पहिलो सार्वजनिक प्रतिक्रिया हो, जुन इरान र इजरायलबीच १२ दिन लामो तनावपश्चात युद्धविराम लागू भएपछिको हो। आफ्नो सम्बोधनमा खामेनीले इरानले विजय हासिल गरेको दाबी गर्दै भने, “इस्लामी गणतन्त्रले अमेरिकालाई चनाखो बनायो। कतारमा रहेको अमेरिका क्षेत्रकै सबैभन्दा ठूलो सैन्य अड्डामा आक्रमण गरेर हामीले अमेरिका र इजरायल दुवैलाई कडा सन्देश दिएका छौं।”
खामेनीले अज्ञात स्थानबाट, एउटा खैरो पर्दाको अगाडि, इरानी झण्डा र पूर्व सर्वोच्च नेता आयातोल्लाह रुहोल्लाह खोमेनीको तस्बीरको बीचमा बसेर सम्बोधन गरेका थिए। पूर्व रेकर्ड गरिएको उक्त सम्बोधनलाई राज्य सञ्चालित टेलिभिजनमार्फत प्रसारण गरिएको थियो।
अमेरिकी राष्ट्रपति डोनाल्ड ट्रम्पको आलोचना गर्दै खामेनीले भने, “ट्रम्पले आत्मसमर्पणको माग गरे, तर इस्लामी गणतन्त्र कहिल्यै झुक्दैन। अमेरिकालाई के थाहा छैन भने हामी आफ्नो स्वतन्त्रता र सार्वभौमिकताको रक्षा गर्न कुनैपनि हदसम्म जान तयार छौं।”
उनले थपे, “अमेरिकाले हाम्रो आणविक केन्द्रहरूमा आक्रमण त गर्यो, तर कुनै उपलब्धि हासिल गर्न सकेन। यसको उद्देश्य इजरायललाई बचाउने मात्र थियो, जुन निस्फल प्रयास हो।”
इरानी मिसाइलहरूले इजरायलको बहु-स्तरीय प्रतिरक्षा प्रणाली भेटेको दाबी गर्दै खामेनीले भने, “त्यो क्षण जब हाम्रो मिसाइलले इजरायली सुरक्षालाई छेड्यो, त्यो नै युद्धको मोड परिवर्तन गर्ने मोड थियो। त्यसपछि अमेरिका युद्धमा प्रत्यक्ष रूपमा प्रवेश गर्यो – इजरायललाई बचाउन।”
ट्रम्पले गत सप्ताहन्त ३०,००० पाउन्डका बमहरूले इरानको आणविक कार्यक्रम ‘पूणर् रूपमा नष्ट’ गरिएको दाबी गरेका थिए। तर, अमेरिकी गुप्तचर निकायहरूका प्रारम्भिक मूल्याङ्कन अनुसार ट्रम्पको दाबी सत्यताबाट टाढा रहेको देखिएको छ। ट्रम्पको आफ्नै प्रशासनभित्रका तीन स्रोतहरूले यस्तो खुलासा गरेका छन्।
इरानी खतरा अन्त्य भएको भन्दै इजरायली प्रधानमन्त्री बेन्जामिन नेतन्याहुले पनि “ऐतिहासिक विजय” को घोषणा गरेका छन्। युद्धविराम लागू भएलगत्तै उनले ट्रम्पसँग हात मिलाएको तस्बीरसहित सामाजिक सञ्जालमा सन्देश पोस्ट गर्दै लेखे, “हामी हाम्रो साझा शत्रुहरूविरुद्ध मिलेर लडिरहनेछौं।”
खामेनीले आफ्नो सम्बोधनको अन्त्यमा भने, “हाम्रो संयमता कमजोरी होइन। हामी क्षेत्रका सबै अमेरिकी सैन्य केन्द्रहरूमा कारबाही गर्न सक्षम छौं, र यदि फेरि कुनै आक्रमण भयो भने, त्यो क्षण पनि टाढा हुनेछैन।”