युएससीआईएसबाट एसाइलीका लागि विवाह मान्यतामा कडाइ
प्रकाशित मिति : असार ११, २०८२ बुधबार
युएससीआईएसले शरणार्थी र एसाइलीहरूले आप्रवासन लाभ प्राप्त गर्नका लागि विवाह मान्यतासम्बन्धी नीतिमा महत्त्वपूर्ण परिवर्तन ल्याएको छ । ३ मार्च २०२५ देखि लागू भएको यो नयाँ नीतिले पहिले अनौपचारिक विवाहहरूलाई मान्यता दिने विशेष छुटलाई खारेज गरी विवाहउत्सव मनाइएको स्थानको नियमलाई कडाइका साथ पालना गर्नुपर्ने बनाएको छ।
युएससीआईएस नीति म्यानुअलको खण्ड ४ मा थपिएको नयाँ प्रावधानले सामान्यतया विवाहको कानुनी मान्यता त्यस विवाह भएको स्थानको कानुनद्वारा निर्धारण गरिने प्रष्ट पारेको छ । यो नियमअनुसार कुनै पनि विवाह आप्रवासन लाभका लागि मान्य हुनका लागि त्यो विवाह भएको क्षेत्रको कानुनअनुसार वैध हुनुपर्छ।
यो परिवर्तन राष्ट्रपति डोनाल्ड ट्रम्पका हालैका कार्यकारी आदेशहरू र बोर्ड अफ इमिग्रेसन अपील्स बीआईएका नजिरहरूमा आधारित रहेको गरिएको युएससीआईएसले जनाएको छ । नयाँ नीतिले अनौपचारिक विवाहहरूलाई मान्यता दिने पहिलेको व्यवस्थालाई पूर्ण रूपमा हटाएको छ।
पहिले, युएससीआईएसले शरणार्थी र एसाइलीहरूलाई उत्पीडनबाट भाग्नुपरेको वा पहिलो शरण देशमा प्रतिबन्धात्मक कानुनका कारण कानुनी विवाह गर्न नसकेको अवस्थामा अनौपचारिक विवाहलाई मान्यता दिन सक्थ्यो। यस्ता विवाहका प्रमाणहरूमा स्थानीय सरकारमा दर्ता नभएको भए पनि धार्मिक वा सांस्कृतिक संस्थाबाट जारी विवाह प्रमाणपत्र, लामो समयसम्मको सहवास, आफूलाई दम्पतीको रूपमा प्रस्तुत गर्नु, वा सम्बन्धबाट जन्मेका सन्तानहरू समावेश गरिदै आएको थियो ।
यी प्रावधानहरू अब हटाइएका छन् । सबै विवाहहरू विवाह भएको स्थानको कानुनअनुसार कानुनी रूपमा वैध हुनुपर्ने भएको छ, जुन बीआईएका नजिरहरू म्याटर अफ लोभो लारा ९ र म्याटर अफ गार्सियामा आधारित छ। यो नीति परिवर्तन २० जनवरी २०२५ मा राष्ट्रपति ट्रम्पद्वारा जारी दुई कार्यकारी आदेशहरूबाट प्रेरित छ ।
ती आदेशहरूले युएससीआईएसलाई पहिलेको नीति खारेज गर्न र कडा कानुनी मापदण्डहरू पालना गर्न निर्देशित गरेको थियो । युएससीआईएसले अनौपचारिक विवाह छुटमा निर्भर गर्ने आवेदकहरूको हितलाई विचार गरेको भए पनि सरकारको एकरूप र कानुनी रूपमा बलियो आप्रवासन नीतिको हितलाई प्राथमिकता दिएको छ। यो नीति ३ मार्च २०२५ मा वा त्यसपछि विचाराधीन वा दायर गरिएका सबै आवेदनहरुमा लागू हुनेछ ।
यो परिवर्तनले शरणार्थी र एसाइलीहरू विशेष गरी द्वन्द्वग्रस्त क्षेत्र वा विवाहसम्बन्धी प्रतिबन्धात्मक कानुन भएका देशहरूबाट आएकाहरूलाई गम्भीर असर पार्नेछ। धार्मिक वा जनजातीय समारोहमा आधारित अनौपचारिक विवाह भएका दम्पतीहरू अब आप्रवासन लाभका लागि आफ्नो विवाहलाई मान्यता नपाउने जोखिममा छन्, जसले परिवारहरूको बिछोड वा पुनर्मिलनमा ढिलाइ हुन सक्छ।
आवेदकहरूले विवाह भएको स्थानको कानुनअनुसार वैध भएको प्रमाणका रुपमा कानुनी विवाह प्रमाणपत्र पेस गर्नुपर्नेछ, जुन अस्थिर नागरिक दर्ता प्रणाली वा भेदभावपूर्ण कानुनी ढाँचा भएका क्षेत्रहरूमा चुनौतीपूर्ण हुन सक्छ। विचाराधीन मुद्दाहरूमा पनि यो नीतिले असर पार्नेछ । किनकि युएससीआईएस अधिकारीहरूले नयाँ मापदण्ड लागू गर्नेछन्।
प्रभावित व्यक्तिहरूले यो परिवर्तनलाई सम्बोधन गर्न तत्काल कदम चाल्नुपर्छ। उनीहरूले आफ्नो विवाह विवाह भएको स्थानको कानुनी मापदण्डअनुसार छ भनी प्रमाणित गर्नुपर्छ, आवश्यक परेमा आधिकारिक विवाह प्रमाणपत्र वा कानुनी राय प्राप्त गर्नुपर्छ।