वार्तापछि पनि रोकिएन रुसी आक्रमण, युक्रेनमा एक बसमा भएको हमलामा ९ जनाको मृत्यु
प्रकाशित मिति : जेष्ठ ३, २०८२ शनिबार
UKRAINE-RUSSIA-CONFLICT-WAR
रुसी ड्रोनले उत्तरपूर्वी युक्रेनको सुमी क्षेत्रमा एक बसमा आक्रमण गर्दा ९ जनाको मृत्यु भएको र ४ जना घाइते भएको स्थानीय अधिकारीहरूले शनिबार जनाएका छन्। यो आक्रमण मस्को र किएभबीच वर्षौंपछि पहिलो प्रत्यक्ष शान्ति वार्ता भएको केही घण्टापछि भएको हो।
युक्रेनको राष्ट्रिय प्रहरीले टेलिग्राममा पोस्ट गर्दै यो आक्रमणलाई ‘निकृष्ट युद्ध अपराध’ को संज्ञा दिएको छ। प्रहरीले सार्वजनिक गरेको तस्बिरमा गाढा नीलो रंगको यात्रु भ्यान लगभग ध्वस्त भएको, छत च्यातिएको र झ्यालहरू फुटेको देखिन्छ।
रुसको सरकारी समाचार एजेन्सी टासले रक्षा मन्त्रालयलाई उद्धृत गर्दै रुसी सेनाले सुमी क्षेत्रमा युक्रेनी सैन्य उपकरण भण्डारण क्षेत्रमा ड्रोन आक्रमण गरेको दाबी गरेको छ।
शुक्रबार टर्कीमा भएको रुसी र युक्रेनी अधिकारीहरूको वार्ता अस्थायी युद्धविराममा सहमति नहुँदा असफल भएको थियो। यो सन् २०२२ को फेब्रुअरीमा रुसले युद्ध सुरु गरेपछिको पहिलो प्रत्यक्ष संवाद थियो।
युक्रेनी विदेशमन्त्री आन्द्रिय सिबिहाले रुसी राष्ट्रपति भ्लादिमिर पुटिनले नागरिकविरुद्ध युद्ध जारी राखेको आरोप लगाए। ‘रुसी आतंक रोक्न मस्कोमाथि दबाब बढाउनुपर्छ’, उनले सामाजिक सञ्जाल एक्समा लेखे।
दुवै पक्षले नागरिकलाई निशाना बनाएको अस्वीकार गरे पनि यो द्वन्द्वमा हजारौंको ज्यान गइसकेको छ, जसमध्ये अधिकांश युक्रेनी छन्।