रेड क्रसले भन्यो – ‘गाजामा सहायता रोकिनु अन्तर्राष्ट्रिय मानवीय कानुनविपरीत’
प्रकाशित मिति : बैशाख २५, २०८२ बिहीबार
(250502) — GAZA, May 2, 2025 (Xinhua) — Palestinians receive free food from a food distribution center in Gaza City, on May 2, 2025. The United Nations Relief and Works Agency for Palestine Refugees in the Near East (UNRWA) said Friday that the ongoing Israeli blockade is worsening the humanitarian situation in the Gaza Strip, particularly affecting women and children. (Photo by Rizek Abdeljawad/Xinhua)
अन्तर्राष्ट्रिय रेड क्रस समितिले गाजामा जारी द्वन्द्वका कारण उत्पन्न भइरहेको मानवीय अवस्थाप्रति गहिरो चिन्ता व्यक्त गर्दै इजरायलद्वारा सबै प्रकारका मानवीय सहायता प्रवेशमा लगाइएको प्रतिबन्धलाई ‘अस्वीकार्य’ भएको बताएको छ ।
रेड क्रसका महासचिव पिएर क्राहेनबुहले जेनेभामा पत्रकार सम्मेलनमार्फत भने, “गाजा पट्टीमा मानवीय सहायता प्रवेश गर्न नदिनु अन्तर्राष्ट्रिय मानवीय कानुनविपरीत हो र यो तत्काल परिवर्तन आवश्यक रहेको विषय हो ।”
उनले वर्तमान परिस्थिति अत्यन्तै नाजुक रहेको जनाउँदै भने, “अबको केही दिन अत्यन्त निर्णायक छन् । हाम्रोमा सीमित औषधि तथा आवश्यक सामग्री रहेका छन्, जुन चाँडै समाप्त हुन सक्छ ।”
इजरायलले मार्च १८ देखि पुनः सैन्य कारबाही सुरु गरेपछि सहायता आपूर्ति पूर्णरूपमा अवरुद्ध भएको हो । इजरायलले भने गाजामा मानवीय सङ्कटको अवस्थालाई अस्वीकार गर्दै हमासविरुद्ध थप कारबाहीको योजना बनाइरहेको बताइएको छ ।
महासचिव क्राहेनबुहले भने, “यदि अहिलेको अवस्था भविष्यको युद्धको नमूना हो भने, यसले हाम्रो मानवता र अन्तर्राष्ट्रिय मूल्यहरूमा गम्भीर प्रश्न खडा गर्छ । सबैले यस अवस्थालाई गम्भीरतापूर्वक लिनु जरुरी छ ।”
उनले सबै प्रकारका सहायता प्रयासहरूलाई सकारात्मक रूपमा हेर्न र सहयोग पुगोस् भन्ने आशयले अवरोध हटाउन आग्रह गरे । “गाजाको सिमानामा ठूलो परिमाणमा सहायता सामग्री तयार अवस्थामा रहेको छ, जुन तत्काल प्रवेश गराउन सकिनेछ,” उनले स्पष्ट पारे ।