क्याथोलिक समुदायको निशानामा परे राष्ट्रपति ट्रम्प, कारण यस्तो रहेछ
प्रकाशित मिति : बैशाख २०, २०८२ शनिबार
फोटो : ड्यानियल टोरोक
अमेरिकी राष्ट्रपति डोनाल्ड ट्रम्प पोपको मृत्युको सन्दर्भमा एआई चित्र पोस्ट गरेपछि क्याथोलिक समुदायको आलोचनामा परेका छन ।
राष्ट्रपति ट्रम्पले आफैंलाई पोपको रूपमा देखाइएको एआई निर्मित तस्बिर सामाजिक सञ्जालमा सेयर गरेपछि केही क्याथोलिकहरूले उनको आलोचना गरेका हुन ।
यो तस्बिर ह्वाइट हाउसको आधिकारिक सामाजिक सञ्जाल एकाउण्टबाट शुक्रबार साझँ सेयर गरिएको हो ।
क्याथोलिक समुदाय भने पोप फ्रान्सिसको २१ अप्रिलमा भएको निधनप्रति शोकमा डुबिरहेको छ । उक्त समुदायले नयाँ पोप चयनको तयारी गर्दैछ ।
न्यूयोर्क राज्य क्याथोलिक सम्मेलनले ट्रम्पमाथि विश्वासको उपहास गरेको आरोप लगाएको छ । केही दिनअघि मात्र ट्रम्पले पत्रकारहरूसँग हाँस्दै आफु ‘पोप’ बन्न चाहेको बताएका थिए ।
ट्रम्प एक्ला अमेरिकी राष्ट्रपति भने होइनन् जसले क्याथोलिक धर्मको उपहास गरेको आरोप खेपेका छन । पूर्व राष्ट्रपति जो बाइडेनले एक वर्ष अघि फ्लोरिडाको टाम्पामा आयोजित गर्भपतन अधिकारसम्बन्धी र्यालीमा क्रसको संकेत गरेपछि व्यापक विवाद भएको थियो ।
ट्रम्पद्वारा पोस्ट गरिएको तस्बिरमा उनलाई सेतो कासक र पोपले लगाउने टुप्पीदार मिटर लगाएको देखिन्छ । उनको घाँटीमा ठूलो क्रस देखिन्छ । उनले औँला उठाएर गम्भीर मुद्रामा उभिएको देखिन्छ।
न्यूयोर्कका बिशपहरूको प्रतिनिधित्व गर्ने न्यूयोर्क राज्य क्याथोलिक सम्मेलनले एक्समा लेख्दै ‘यो तस्बिरमा केही पनि रमाइलो वा बौद्धिक छैन, राष्ट्रपति महोदय’ भनेर आलोचना गरेको छ ।
‘प्रिय पोप फ्रान्सिसलाई भर्खरै अन्त्येष्टि दिएका छौँ र कार्डिनलहरू नयाँ पोप चयनका लागि गम्भीर सत्रमा प्रवेश गर्न लागिरहेका छन् । यस्तो बेलामा कृपया हामीमाथि उपहास नगर्नुहोस्’ भनेर सम्मेलनले भनेको छ ।
इटलीका पूर्व प्रधानमन्त्री माटेओ रेनजिले पनि ट्रम्पको पोस्टको आलोचना गरेका छन । तर ह्वाइट हाउसले भने ट्रम्पले पोप वा क्याथोलिक धर्मको अपमान गरेको दाबीलाई अस्वीकार गरेको छ ।
राष्ट्रपति ट्रम्प पोप फ्रान्सिसप्रति श्रद्धाञ्जली दिन र अन्त्येष्टिमा सहभागी हुन इटाली पुगेका थिए । प्रेस सचिव क्यारोलिन लेविटले ट्रम्प सधैं क्याथोलिकहरू र धार्मिक स्वतन्त्रताको पक्षमा दृढ रूपमा उभिएका व्यक्ति भएको बताएकी छन ।