अमेरिकी पूर्व सिनेटरकी श्रीमती भष्ट्राचारी ठहर, सजाय १२ जुनमा सुनाइने
प्रकाशित मिति : बैशाख ८, २०८२ सोमबार
अमेरिकाको न्यूयोर्कको एक अदालतले पूर्व न्युजर्सी सिनेटर रोबर्ट मेनेन्डेजकी ५८ बषीया पत्नी नाडिन मेनेन्डेजलाई भष्टाचारको आरोपमा दोषी ठहर गरेको छ ।
उनलाई १५ वटै अभियोगमा दोषी ठहर अदालतले गरेको छ । ती अभियोगमा घूस, न्याय अवरोध र भ्रष्टाचार सम्बन्धी गम्भीर आरोपहरू रहेका छन् ।
आफ्ना पतिको तर्फबाट नगद, सुनका ब्रासलेटहरू र मर्सिडिज बेन्ज जस्ता महँगा उपहारहरू लिएर राजनीतिक सुविधा उपलब्ध गराएको आरोप छ ।
उनलाई आफ्ना पतिको साथमा सेप्टेम्बर २०२३ मा अभियोजन गरिएको थियो । तर स्तन क्यान्सरको उपचारका कारण उनको मुद्दा पछि सारिएको थियो ।
अब उनको सजाय घोषणा १२ जुन मा गरिने भएको छ । उनका पति रोबर्ट मेनेन्डेज लाई जुलाई २०२४ मा दोषी ठहर गरिँदा ११ वर्षको जेल सजाय सुनाइएको थियो ।
न्यूयोर्कको दक्षिणी जिल्ला लागि अमेरिकी अटर्नीको कार्यालयले जारी गरेको विज्ञप्तिमा मेनेन्डेज दम्पतीलाई अपराधमा साझेदार भनिएको छ ।
फैसलाले सरकारी अधिकारीहरूको शक्ति बिक्री गर्न सकिँदैन भन्ने सन्देश दिएको छ । मुद्दाका क्रममा सरकारी वकिलहरूले नाडिन मेनेन्डेज आफ्ना पतिको भ्रष्टाचार योजनाको हिस्सा भएको बताए ।
अमेरिकी संघीय अनुसन्धान ब्युरो ले सन् २०२२ मा दम्पतीको न्यु जर्सीस्थित घरमा खोजी गर्दा १ लाख डलर भन्दा बढी मूल्यको सुनका सामग्रीहरू र सयौं हजार डलर नगद कपडामा वा खाममा लुकाएको अवस्थामा फेला पारेको थियो ।
सरकारले टेक्स्ट सन्देशहरू, डिजिटल कुराकानी, र एक गूगल सर्च पनि प्रस्तुत गरेको थियो । जसमा पूर्व सिनेटरले एक किलो सुनको मूल्य कति हुन्छ ? भनेर सर्च गरेका थिए ।
प्रहरीका अनुसार नाडिन र रोबर्ट मेनेन्डेजले पूर्व सिनेटरको प्रभाव प्रयोग गरी मिश्र सरकारलाई गोप्य रूपमा सहयोग गरेका थिए ।
त्यो बेलामा रोबर्ट मेनेन्डेज अमेरिकी सिनेटको विदेश नीति सम्बन्धी प्रभावशाली समितिको शीर्ष डेमोक्र्याट थिए। अब नाडिन मेनेन्डेजलाई लामो जेल सजाय हुने सम्भावना छ । उनको सजाय जुन १२ जुनमा सुनाइनेछ ।