हनुमानढोकामा भित्र्याइँयो फूलपाती, (फोटो फिचर)
प्रकाशित मिति : आश्विन ११, २०७४ बुधबार
हिन्दु नेपालीहरुको सबैभन्दा ठूलो चाड बडा दशैंको सातौ दिन बुधबार गोरखाबाट ल्याइएको फूलपाती हनुमान ढोका दरबारमा भित्र्याइएको छ । गोर्खा दरबारको दशैं घरबाट ल्याईएको फूलपाती विधिपूर्वक बसन्तपुरको हनुमानढोकास्थित दशैं घरमा भित्र्याइएको हो ।
गोर्खाबाट ल्याइएको फूलपातीलाई हनुमानढोकाबाट हर्षबढाईँका साथ गएको लावालस्करद्वारा जमल पुगी बाजागाजासहित पाल्कीमा ल्याइएको फूलपाती दशैंघरमा पुर्याई भित्र्याइएको हो । दरबारिया प्रचलनअनुसार नै फूलपाती लिन जाने लावालस्करमा नेपाली सेनाको टोली गएको थियो ।
सैनिक व्याण्ड, शार्दुलजंग गुल्म, पञ्चैबाजा, सिंगारिएका कल्स्यौली, गुरुज्युको पल्टन, विभिन्न सांस्कृति झल्कने नाचगान टोली, गुठी संस्थानका पदाधिकारी, निजामती कर्मचारी, नेपाल प्रहरी सम्मिलित टोली फूलपाती भित्र्याउन पुगेको थियो ।
गोर्खा दशै घरबाट ल्याईएको फुलपातीलाई धादिङ्गको छत्रेदेउरालीबाट भने हनुमानढोका दरबार हेरचाह अड्डाबाट गएको टोलीले लिएर आउने गर्छन् । सो फूलपाती जमल ल्याइपुर्याएपछि लावालस्करसहित दशैंघर पुर्याउने दरबारिया प्रचलन नै हो ।
केराको बोट, बेलपत्र, दारिम, जयन्ती, धानको बोट, हलेदो, माने, कचुर, अशोकका पात आदिका नयाँ पालुवाहरुलाई फूलपातीका रुपमा शुभसाइतको प्रतीक मानी दुर्गा भवानीको प्रतिमा राखिएको दशैं घरमा विधिपुर्वक भित्र्याउने धार्मिक प्रचलन रहेको छ ।
