युनाइटेड हेल्थ केयरका प्रमुखको हत्यामा सम्लग्नका विरुद्ध मृत्युदण्डको सजाय मागियो
प्रकाशित मिति : चैत्र २०, २०८१ बुधबार
अमेरिकी अभियोजकहरूले युनाइटेड हेल्थ केयरका सीईओ ब्रायन थम्पसनको हत्या गरेको आरोप लागेका व्यक्ति विरुद्ध मृत्युदण्डको सजाय माग गरेका छन ।
लुइगी म्याङ्जियोनमाथि थम्पसनको गोली हानी हत्या गरेको आरोप रहेको छ । उनको गत डिसेम्बरमा न्यूयोर्कमा गोली हानेर हत्या गरिएको थियो ।
अटर्नी जनरल प्याम बन्डीले संघीय अभियोजकहरूलाई पूर्वनिर्धारित हत्याको आरोपमा मृत्युदण्डको माग गर्न निर्देशन दिएको बताएकी छन ।
ब्रायन थम्पसनलाई ४ डिसेम्बरमा न्यूयोर्कको एक होटेल बाहिर गोली हानी हत्या गरिएको थियो । प्रहरीले केही दिन पछि पेन्सिलभेनियाबाट म्याङ्जियोनलाई पक्राउ गरेको थियो।
म्याङ्जियोनले आफू विरुद्ध राज्यले लगाएको आरोपलाई अस्वीकार गरेका छन ।
तर संघीय आरोपहरूको लागि अझै कुनै जवाफ उनले अहिलेसम्म दिएका छैनन । उनी अहिले न्यूयोर्कको एक कारागारमा अनुसन्धानका लागि राखिएका छन ।
बन्डीले थम्पसनको हत्या राजनीतिक हिंसाको कुकृत्य भएको भन्दै यसले वरिपरिका अन्य व्यक्तिहरूको मृत्युको गम्भीर जोखिम उत्पन्न गर्न सक्ने भएकाले मृत्युदण्ड आवश्यक रहेको बताइन ।
अनुसन्धानकर्ताहरूका अनुसार म्याङ्जियोनले ५० वर्षीय थम्पसनलाई अमेरिकी स्वास्थ्य बीमा कम्पनीहरूसँगको रिसको कारण मारेको हत्या गरेका थिए ।
म्याङ्जियोनलाई न्यूयोर्क राज्यमा ११ वटा आपराधिक आरोपहरु लगाइएको छ । पहिलो डिग्री हत्या र आतंकवाद अपराधको रूपमा हत्या भएको पनि ति ११ आरोपमा समावेश गरिएको छ ।
यदि सबै आरोपमा उनी दोषी ठहरिए भने उनलाई विना धरौटी जीवनभरको कारावासको सजाय हुनेछ।