यूएसएआईडी बन्द गर्ने थप कदम नचाल्न ट्रम्प प्रशासनलाई संघीय न्यायाधीशको आदेश
प्रकाशित मिति : चैत्र ५, २०८१ मंगलबार
अमेरिकी संघीय न्यायाधीशले ट्रम्प प्रशासनलाई अमेरिकी अन्तर्राष्ट्रिय विकास एजेन्सी यूएसएआईडी बन्द गर्ने थप कदम नचाल्न आदेश दिएका छन ।
न्यायाधीश थियोडोर चुआङले मंगलबार ट्रम्पका सहयोगी एलन मस्कको सरकारी दक्षता विभागले यूएसएआईडी एजेन्सी बन्द गर्नका लागि गरेको प्रयासले अमेरिकी संविधानकाका केही प्रावधानलाइ उल्लङ्घन गरेको बताएका हुन ।
चुआङले दिएको आदेशमा दक्षता विभागले यूएसएआईडी का कर्मचारीहरूको लागि कम्प्युटर र भुक्तानी प्रणालीहरूको पहुँच पुनःस्थापित गर्नुपर्छ भनिएको छ ।
न्यायाधीशले यूएसएआईडी का कर्मचारीहरूको बर्खास्तीमा रोक पनि लगाएका छन । तर यसअघि नै विदामा राखिएका कर्मचारीहरूको पुनःस्थापना गर्न न्यायाधीसले भनेका छैनन्।
यूएसएआईडीका कर्मचारीहरूको पक्षमा दायर गरिएको मुद्दामा न्यायाधीशको यो आदेश आएको हो । कर्मचारीहरूका वकिलहरूले १३ फेब्रुअरीमा दायर गर्दै मस्कको शक्तिलाई अवैध भनेका थिए ।
ट्रम्पको दोस्रो कार्यकालको सुरुवातमा मस्कको नेतृत्वमा दक्षता विभागले कटौती गर्नको लागि लक्षित गरेको पहिलो एजेन्सीहरूमध्ये यूएसएआईडी एक हो ।
ट्रम्पले जनवरी महिनामा अमेरिकी विदेशी सहायता प्रणालीलाई ९० दिनको लागि रोक्न आदेश दिएका थिए । मस्क र दक्षता विभागलाई अदालतले केवल सल्लाहकारको मात्र हो भनेको छ ।
तर न्यायाधीश चुआङले भने कि मस्क र दक्षता विभागले ले यूएसएआईडीलाई नियन्त्रणमा राखेर अमेरिकाको संविधानका केहि प्रावधानको उल्लङ्घन गरेको बताएका हुन । अहिले यूएसएआईडीबाट सञ्चालिन ८० प्रतिशत कार्यक्रम रोकिएका छन ।
ट्रम्प प्रशासनले मंगलबारको निर्णयको आलोचना गरेको छ । दुराग्राही न्यायाधीशहरूले अमेरिकी जनताको इच्छाको विरुद्ध राष्ट्रपति ट्रम्पको एजेन्डा लागू गर्न रोक लगाउने प्रयास गरेको आरोप लगाएको छ ।
ह्वाइट हाउसकी प्रवक्ती एना केलीले उक्त निर्णयलाई न्यायको अन्याय भन्दै अपील गर्ने घोषणा गरेकी छिन ।
स्टेट डेमोक्रेसी डिफेन्डर्स फण्डका कार्यकारी अध्यक्ष नॉर्म आइसन, जसले यस निर्णयलाई मस्क र दक्षता विभागको कानूनी अतिक्रमणका बिरुद्धमा कोशे ढुङगा भनेका छन ।
कतिपयले अदालतको यो निर्णय ट्रम्प प्रशासनको लागि अर्को कानूनी पराजय हो भनेका छन ।