नेपालमा दिगो विकासको लक्ष्य कार्यान्वयन गर्न वार्षिक २३ बिलियन अमेरिकी डलर आवश्यक
प्रकाशित मिति : फाल्गुन १४, २०८१ बुधबार
राष्ट्रिय योजना आयोगका उपाध्यक्ष प्रा.डा. शिवराज अधिकारीले नेपालमा दिगो विकासको लक्ष्य कार्यान्वयनमा लागि वार्षिक करिब २३ बिलियन अमेरिकी डलर परिचालन गर्नुपर्ने बताएका छन् ।
थाइल्यान्डको बैंककमा जारी एसिया प्रशान्त क्षेत्रीय दिगो विकास मञ्चको दोस्रो दिन “स्वैच्छिक राष्ट्रिय समीक्षामार्फत दिगो विकास एजेन्डाको द्रुत कार्यान्वयन“ विषयक छलफलमा मुख्य वक्ताको रूपमा सम्बोधन गर्दै उनले यस्तो बताएका हुन् । सो अवसरमा उपाध्यक्ष प्रा.डा. अधिकारीले दिगो विकास लक्ष्यको कार्यान्वयनमा स्वेच्छिक राष्ट्रिय समीक्षाको भूमिकाको सम्बन्धमा नेपालको अनुभव आदानप्रदान गरेका थिए ।
उनले नेपालमा दिगो विकास लक्ष्यमा नेपालले प्राप्त गरेको प्रगतिबारे प्रकाश पारे । उनले दिगो विकासका लक्ष्यहरूमा प्रगति हासिल गर्न नेपालमा निजी क्षेत्र, गैरसरकारी क्षेत्र, नागरिक समाज लगायतले खेलेको भूमिकाको प्रशंसा समेत गरे ।
नेपालले सन् २०२४ को जुलाईमा संयुक्त राष्ट्र सङ्घको आर्थिक तथा सामाजिक परिषद्को आयोजना भएको उच्च स्तरीय राजनीतिक मञ्चमा तेस्रो स्वेच्छिक समीक्षा प्रस्तुत गरेको थियो । समीक्षाका अनुसार २०२२ सम्ममा नेपालले दिगो विकास लक्ष्यमा करिब ४१ प्रतिशत प्रगति हासिल गरेको छ भने सन् २०३० सम्ममा करिब ६० प्रतिशत प्रगति हासिल गर्ने अनुमान गरिएको छ । यसअघि सन् २०१७ र सन् २०२० मा नेपालले स्वेच्छिक राष्ट्रिय समीक्षा प्रस्तुत गरेको थियो ।
