दम्पत्ति हुँदाहुँदै अरुसँग शारीरिक सम्बन्ध राखेमा अमेरिकामा कुन कुन राज्यमा सजाय हुन्छ?
प्रकाशित मिति : पुस ९, २०८१ मंगलबार
पछिल्लो समयमा अमेरिकाको नेपाली समुदायमा पनि विवाहितहरुले छुट्टै व्यक्तिसँग सम्बन्ध राखेका घटनाहरुले पारिवारिक विखण्डन र घरेलु हिंशाका घटना समेत बढ्दो पाइएको छ । कहिले पत्नीले अरुसँग शारीरिक सम्बन्ध राखेको भन्दै पतिले प्रहरी नै बोलाउने त कहिले पतिले अरुसँग शारीरिक सम्बन्ध राखेको भन्दै पत्नीले प्रहरी बोलाउने सम्मका घटना हुने गरेका छन् । कतिपय यस्ता घटनाहरु डिभोर्समा टुंगिने गरेका छन् ।
दम्पत्ति हुँदाहुँदै अरुसँग शारीरिक सम्बन्ध राख्नुलाई व्यभिचार भनिन्छ । व्यभिचारलाई सामान्यतया विवाहित व्यक्ति र दम्पत्ति नभएको व्यक्ति बीचको स्वैच्छिक यौन सम्बन्ध भनेर परिभाषित गरिएको छ । अमेरिकाका कैयन राज्यहरुका कानुनमा यसलाई अपराधका रुपमा लिइएको छ भने त्यस्तो अपराध गर्नेलाई सजायको समेत व्यवस्था छ ।
अलाबामा, एरिजोना, फ्लोरिडा, जर्जिया, इलिनोय, कन्सास, मेरील्याण्ड, नर्थ क्यारोलिना, नर्थ डकोटा, रोड आइल्याण्ड, साउथ क्यारोलिना र भर्जिनिया लगायत देशभरका धेरै अन्य राज्यहरूमा व्यभिचारलाई अझै पनि दुष्कर्म अपराध मानिन्छ। र त्यस्तो गर्नेलाई सजायको व्यवस्था छ । त्यस्तै ओक्लाहोमा, विसकन्सिन र मिशिगनमा त यो जघन्य अपराध हो। त्यहाँ अझ कडा सजाय हुन्छ ।
न्युयोर्कमा पनि गत महिनासम्म व्यभिचारलाई दुश्कर्म अपराधका रुपमा मान्ने कानुन रहेको थियो । बी श्रेणीको दुश्कर्मका रुपमा व्यभिचार गर्नेलाई ५ सय डलरसम्म जरिवाना र ९० दिनसम्म जेल सजायको व्यवस्था रहेको थियो । तर गत महिनादेखि यो कानुन हटेको छ । राज्य संसदबाट पारित बिलमा गभर्नर क्याथी होकुलले हस्ताक्षर गरेपछि न्युयोर्कमा अब व्यभिचारलाई अपराध मानिदैन । न्युयोर्कमा सन् १९०७ को कानुन पुरानो भएको भन्दै त्यसलाई हटाइएको हो ।
यस अगाडि न्युयोर्कको दण्ड संहितामा जिवित दम्पत्ति भएको अवस्थामा अरुसँग यौन सम्बन्ध राखेमा व्यभिचारको लागि दोषी ठहर गर्ने व्यवस्था थियो । जस अन्तरगत १३ जनालाई पक्राउ गरी कानून बमोजिम मुद्दा चलाइएको थियो भने पाँच जनालाई दोषी ठहर गरिएको थियो । केही अदालती अभिलेखहरू सजिलै पहुँचयोग्य नभएका कारण संख्याहरू अझ बढी हुने अनुमान गरिएको छ ।
गत मे महिनामा मिनेसोटाका गभर्नर टिम वाल्जले राज्यको कानुनबाट व्यभिचारलाई अपराधको रूपमा हटाउने व्यापक सर्वव्यापी विधेयकमा हस्ताक्षर गरेका थिए । त्यसको एक वर्ष अघि आइदायोका गभर्नर ब्राड लिटिलले राज्यको व्यभिचार कानून खारेज गर्ने कानूनमा हस्ताक्षर गरेका थिए । सन् २०२२ को जुलाई १ देखि आइदायोमा पनि व्यभिचार अवैध मानिदैन।
यद्यपि अमेरिकी सर्वोच्च अदालतले व्यभिचार कानूनको सम्बन्धमा कहिल्यै मुद्दा उठाएको छैन । सन् २००३ मा टेक्सासको संघीय अदालतले गरेको निर्णयले गोपनीयताको संवैधानिक अधिकारमा आधारित रहेर यौनसम्बन्धलाई अपराधीकरण गर्ने कानूनलाई समाप्त गरेको थियो ।