इजरायल र हिजबुल्लाहबीच युद्धविरामको संभावना बढेको अमेरिकाको दावी
प्रकाशित मिति : कार्तिक १५, २०८१ बिहीबार
LEBANON-ISRAEL-PALESTINIAN-CONFLICT
इजरायल र लेबनानको हिजबुल्लाह बीच युद्धविरामको संभावना बढेको बरिष्ठ अमेरिकी अधिकारीहरुले बताएका छन । अमेरिकी विदेश मन्त्री एन्टोनी ब्लिन्कनले सम्भावित सम्झौतामा वार्ताकारहरूले राम्रो प्रगति गरेको जानकारी दिनुभयो ।
राष्ट्रपति जो बाइडेनका मध्यपूर्व समन्वयक ब्रेट म्याकगर्क र हिजबुल्लाहसँगको संघर्षमा वार्ता नेतृत्व गरेका एमोस होचस्टिन इजरायलमा छन् ।
उनीहरूले त्यहाँका अधिकारीहरूसँग छलफल गरिरहेका छन् । अर्को हप्ता हुने अमेरिकी राष्ट्रपतीय निर्वाचन अघि केही प्रगति हुने या नहुने प्रष्ट देखिएको छैन ।
इजरायलले लेबनानभर हवाई आक्रमण गरिरहेको छ । सीमावर्ती क्षेत्रहरूमा स्थलगत आक्रमण जारी राखेको छ । लेबनानी स्वास्थ्य मन्त्रालयका अनुसार, जारी द्वन्द्वमा कम्तिमा २ हजार २०० मानिसको ज्यान गएको छ ।
१२ लाख मानिसहरू विस्थापित भएका छन् । जसमा धेरैजसो शिया मुसलमान रहेका छन । यसले धार्मिक तनावलाई बढाएको छ । सार्वजनिक सेवामा थप दबाब थपेको छ ।
इजरायली सरकारले आफ्नो उद्देश्य सीमा क्षेत्रमा सुरक्षा स्थिति परिवर्तन गर्नु र हिजबुल्लाहका रकेट, मिसाइल र ड्रोन आक्रमणका कारण विस्थापित भएका करिब ६० हजार मानिसलाई फर्काउनु रहेको बताएको छ ।
अमेरिकाले तयार गरेको भनिएको प्रारम्भिक ६० दिने युद्धविरामको मस्यौदा प्रकाशित गरेको थियो इजरायलको राष्ट्रिय प्रशारणले सार्वजनिक गरेको थियो । इजरायली सेना सम्झौतासँगै पहिलो हप्तामा लेबनानबाट फिर्ता हुने र लेबनानी सेना सीमामा तैनाथ हुनेछ ।
युद्धविराम अवधिमा, हिजबुल्लाहले आफ्नो सशस्त्र उपस्थिति समाप्त गर्नेछ भनेर उल्लेख गरिएको छ । इजरायललाई लेबनानी सेना र संयुक्त राष्ट्रसंघको शान्ति सेनाले हिजबुल्लाहलाई सीमाबाट टाढा राख्न सक्छ भन्नेमा शंका छ ।
इजरायलले युद्धबिराम समाप्त भएपछि आवश्यक परे हिजबुल्लाहमाथि हमला गर्ने अधिकार पाउन चाहन्छ । लेबनानी अधिकारीहरूले भने यसमा परिवर्तन हुनुहुँदैन भन्दै यस मागलाई अस्वीकार गर्न सक्छन् ।
ह्वाइट हाउसका राष्ट्रिय सुरक्षा प्रवक्ता सीन साभेटले कानद्वारा प्रकाशित दस्तावेजको बारेमा प्रतिक्रिया दिँदै विभिन्न मस्यौदाहरू भए तापनि ती वर्तमान वार्ताको अवस्थालाई प्रतिबिम्बित नगर्ने बताए ।
हिजबुल्लाहका नयाँ महासचिव नाइम कासिमले इजरायलको कुनै पनि प्रस्ताव चर्चा गर्न योग्य नभएको बताएका छन् ।