इजरायली आक्रमणमा हिजबुल्लाहका रकेट र मिसाइल यूनिटका प्रमुखको मृत्यु , मृतकको संख्या ५६४ पुग्यो
प्रकाशित मिति : आश्विन ८, २०८१ मंगलबार
लेबनानमा रहेको लडाकु समूह हिजबुल्लाहका उच्च सैन्य कमाण्डर मारिएका छन । इजरायलले बेरुतमा गरेको हमलामा इव्राइम कोबेसी मारिएका हुन ।
कोबेसी मारिएको हिजबुल्लाहले पनि पुष्टि गरेको छ । इजरायलले दावी गरे अनुसार कोबेसी हिजबुल्लाहका रकेट र मिसाइल यूनिटका प्रमुख थिए ।
इजरायलमाथी भइरहेका हमलामा कोेबेसी जिम्मेवार रहेको इजरायली सेनाले दावी गरेको छ । उनीमाथी कम्तिमा २ हजार आक्रमणका योजना बनाएको आरोप छ । यो आक्रमण र मृत्युले हिजबुल्लाहलाई ठुलो क्षति पुगेका अनुमान गरिएको छ ।
लेबनान माथी हिजबुल्लाह लक्षित आक्रमणलाई इजरायलले तिब्र बनाएपछि फ्रान्सको अनुरोधमा संयुक्त राष्ट्रसंघ सुरक्षा परिषदले बुधबार लेबनानमा आपतकालीन बैठक बोलाएको छ ।
हिजबुल्लाहको बलियो उपस्थिति लेबनानको दक्षिणी बेरुत उपमहानगरलाई लक्षित गरि इजरायलले हमला गरिरहेको छ ।
लेबनानको स्वास्थ्य मन्त्रालयले इजरायली हमलामा ५० बालबालिका , ९४ महिला सहित ५ सय ६४ जनाको ज्यान गएको बताएको छ । त्यहाँ करिव २ हजार घाइते भएका छन ।
हिजबुल्लाहले पनि इजरायलमा हमला गरिरहेको छ । तर त्यो प्रभावकारी देखिएको छैन । हिजबुल्लाह प्यालेस्टिनी लडाकु समूह हमासको समर्थक हो । यसले हमासलाई गाजा क्षेत्रमा भइरहेको युद्धमा सघाइरहेको छ ।
इजरायलले लेबनानमा गरेको आक्रमण र क्षति सन् १९९० मा सकिएको गृहयुद्धपछिको सबैभन्दा ठूलो रहेको लेबनानी स्वास्थ्य मन्त्रालयले जनाएको छ ।
यसैबिच इरानका राष्ट्रपति मसूद पेजेस्कियनले हिजबुल्लाह इजरायल आक्रमण विरुद्ध एक्लै खडा हुन नसक्ने बताउनुभएको छ । पश्चिमी मुलुक, युरोपेली देश र संयुक्त राज्य अमेरिकाबाट सुरक्षा र समर्थन प्राप्त भइरहेको इजरायल विरुद्ध हिजबुल्लाह एक्लै खडा हुन नसक्ने बताउनु भएको हो ।
यदि मध्यपूर्वमा ठुलो युद्ध भयो भने यसले विश्वव्यापी रूपमा कसैलाई फाइदा नपुर्याउने उहाँको भनाई छ ।
इरानले संयुक्त राष्ट्र सुरक्षा परिषदलाई इजरायल विरुद्ध “तत्काल कारबाही गर्न“ आह्वान गरेको छ ।
बढ्दो हिंसाप्रति संयुक्त राष्ट्रसङ्घ र मध्यपूर्वी देशहरूले चिन्ता व्यक्त गरेका छन् ।