हमासको हमलामा इजरायलका क्याप्टेनसहित ८ सैनिक मारिए
प्रकाशित मिति : असार १, २०८१ शनिबार
इजरायली सेनाले दक्षिणी गाजाको रफाहमा “सैन्य गतिविधि“ मा आफ्ना ८ सैनिक मारिएको जनाएको छ ।
समाचार एजेन्सी एएफपीले इजरायली सञ्चारमाध्यममा सशस्त्र गाडीको विष्फोटबाट आठ सैनिकको मृत्यु भएको जनाएको छ ।
बिबिसी हिन्दीका अनुसार इजरायली सेनाले मृतक मध्ये एक जना क्याप्टेन रहेको र मारिएका अन्यको नाम पछि सार्वजनिक गरिने बताएको छ ।
सेनाले एक विज्ञप्ति जारी गर्दै मृतक सैनिकका परिवारलाई जानकारी गराएको जनाएको छ ।
अर्कोतर्फ, हमासको सशस्त्र समूह (इज्जेदिन अल–कसाम ब्रिगेड्स) ले इजरायली सेनाको बुलडोजरमा रकेट प्रहार गरेको र त्यसमा आगो लागेको बताएको छ ।
हमासका अनुसार सहयोग गर्न आएको एउटा सशस्त्र गाडीलाई पनि रकेटले निशाना बनाएको थियो, जुन आक्रमणमा ध्वस्त भएको थियो ।
विगत केही सातादेखि इजरायली सेनाले रफाहमा हमासको स्थानमा आक्रमण गर्दै आएको छ । हमासका अन्तिम केही बटालियनहरू यहाँ लुकेका छन् ।