बुधबार दिउसो २ बजेर २० मिनेटमा अमेरिकामा सबैको फोनमा अलार्म बज्ने, कारण यस्तो छ
प्रकाशित मिति : आश्विन १५, २०८० सोमबार
बुधबार दिउसो २ बजेर २० मिनेटमा अमेरिकामा तपाईको फोनमा अलार्म बज्न थाल्यो भने नआत्तिनुहोला । तपाईको फोनमा चेतावनी जनाउने आवाज सुन्नुभयो भने नडराउनुहोस्। अमेरिकाको संघीय सरकारले बुधबार दिउँसो आफ्नो आपतकालीन चेतावनी प्रणाली र ताररहित आपतकालीन अलर्टहरूको राष्ट्रव्यापी परीक्षण गर्ने जनाएको छ।
परीक्षणको आपतकालीन चेतावनी प्रणाली भागले सबै रेडियो र टेलिभिजनहरूमा आपतकालीन अलर्ट पठाउनेछ भने परीक्षणको ताररहित आपतकालीन अलर्ट भागले सबै उपभोक्ताका सेल फोनहरूमा अलर्टहरू पठाउनेछ ।
अक्टुबर ४ मा हुने परीक्षणको उद्देश्य भनेको प्रणालीहरू आपतकालिन अवस्थाहरू, विशेष गरी राष्ट्रिय स्तरमा भएकाहरूलाई सचेत गराउने प्रभावकारी माध्यमको रूपमा जारी रहेको सुनिश्चित गर्नु रहेको संघीय आपतकालीन व्यवस्थापन एजेन्सीले जनाएको छ । यही एजेन्सीले नै परीक्षण सञ्चालन गरिरहेको छ। संघीय सञ्चार आयोगले जारी गरेको विज्ञप्तिमा यसबारे प्रष्ट पारिएको छ ।
यो बुधवार लगभग २ बजेर २० मिनेटमा सुरु हुनेछ । सबै वायरलेस फोनहरूले एक अलर्ट र एउटा सन्देश प्राप्त गर्नेछन् । जसमा यो राष्ट्रिय ताररहित आपतकालीन चेतावनी प्रणालीको परीक्षण भएको र कुनै कारबाही आवश्यक नभएको उल्लेख हुनेछ ।
तपाईंको उपकरणको भाषा सेटिङहरूमा निर्भर गर्दै सन्देश अंग्रेजी वा स्पेनिशमा पठाइनेछ। सन्देश एक अद्वितीय टोन र कम्पनसंग आउनेछ जुन अपाङ्गता भएका व्यक्तिहरु सहित अलर्टलाई सबै जनताको लागी पहुँचयोग्य बनाउनको लागी हो ।
परीक्षण सेल टावरहरू द्वारा २ बजेर २० मिनेटबा सुरु भइ लगभग आधा घण्टा हुनेछ । अर्थात आधाघण्टाको कुनै पनि अवधिमा तपाईले अलर्ट प्राप्त गर्नुहुनेछ । यस अवधिमा सक्रिय सेल टावरको दायरा भित्र स्विच अन गरिएका सबै वायरलेस फोनहरूमा सन्देश प्राप्त हुनेछ ।
यसैबीच सबै रेडियो र टेलिभिजनहरूले पनि व्यापक परीक्षणको भागको रूपमा एकै समयमा परीक्षण आपतकालीन अलर्ट प्रसारण गर्नेछन्। यो सन्देश लगभग एक मिनेटको लागि चल्नेछ । जसमा संघीय आपतकालीन व्यवस्थापन एजेन्सी द्वारा जारी गरिएको आपतकालीन चेतावनी प्रणालीको राष्ट्रव्यापी परीक्षण भएको र कुनै कारबाही आवश्यक नभएको उल्लेख हुनेछ ।
बुधबारको परीक्षण आपतकालीन चेतावनी प्रणालीको सातौं राष्ट्रव्यापी परीक्षण हो । यो वायरलेस आपतकालीन अलर्टहरूको तेस्रो राष्ट्रव्यापी परीक्षण हो, तर उपभोक्ता सेलुलर उपकरणहरूमा पठाइने भने दोस्रो मात्र हो। दुबै प्रणालीको सबैभन्दा भर्खरको परीक्षण सन् २०२१ मा भएको थियो। आपतकालीन अलर्ट प्रणालीको पहिलो पटक परीक्षण एक दशकभन्दा अघि २०११ मा भएको थियो।
यो प्रणालीको उपयोग गरेर सरकारले ठस्ला गल्तीहरु पनि गरेको छ । सबैभन्दा कुख्यात घटना हवाईमा सन् २०१८ मा भएको थियो । जसले राज्यभर अल्पकालीन आतंकको लहर खडा गर्यो। जनवरी १३, २०१८ को बिहान एक हवाई राज्य आपतकालीन व्यवस्थापन कार्यकर्ताले दुर्घटनावश आपतकालीन अपरेशन केन्द्रमा गलत बटन थिच्दा ब्यालिस्टिक मिसाइल आउँदै गरेको खतराको गलत चेतावनी फोनहरुमा गएको थियो । गलत बटन थिच्ने कर्मचारीलाई अन्ततः बर्खास्त गरिएको थियो ।
यस वर्षको सुरुमा फ्लोरिडामा राज्यको आपतकालीन व्यवस्थापन अधिकारीहरूले माफी मागेका थिए जब फ्लोरिडावासीहरूले बिहान ५ बजेतिर तिनीहरूको फोनमा पठाइएको परीक्षण आपतकालीन सतर्कता पाएका थिए । परीक्षण अलर्ट केवल टिभीमा चलाउनको लागि थियो, सुतिरहेको कसैलाई बाधा पुर्याउनको लागि होइन। यो गल्तीपछि फ्लोरिडाले उक्त सफ्टवेयर कम्पनीसँग आफ्नो सम्झौता समाप्त गरेको थियो ।