अमेरिकाका १०० उत्कृष्ट कलेजमा न्युयोर्कका ११, कुन कुन परे टपटेनमा?
प्रकाशित मिति : आश्विन १, २०८० सोमबार
युएस न्यूज एण्ड वर्ल्ड रिपोर्टले सोमबार न्युयोर्कका एघार कलेजहरूलाई देशका शीर्ष १०० मा पारेको छ । १५ सय कलेज र विश्वविद्यालयहरूको शैक्षिक गुणस्तरको १९ मापदण्डहरु प्रयोग गरी मूल्याङ्कन गरिएको डिजिटल मिडिया कम्पनीले एक समाचार विज्ञप्तिमा बताएको छ । यस वर्ष कम्पनीले सामाजिक गतिशीलता र स्नातकहरूका लागि नतिजाहरूमा बढी जोड दिँदै कलेजहरूको श्रेणी निर्धारण गर्ने तरिकामा उल्लेखनीय परिवर्तन गरेको बताएको छ।
देशभरको सुचीमा पहिलो नम्बरमा न्युजर्सीको प्रिन्सटन युनिभर्सिटी रहेको छ भने दोश्रो नम्बरमा मासाचुसेट्स इन्स्टीच्युट अफ टेक्नोलोजी एमआईटी रहेको छ । सुचीमा तेश्रो नम्बरमा भने बराबर अंकका साथ हार्भर्ड युनिभर्सिटी र स्टानफोर्ड युनिभर्सिटी परेका छन् । पाँचौं नम्बरमा यल युनिभर्सिटी परेको छ भने छैठौंमा युनिभर्सिटी अफ पेन्सिलभेनिया परेको छ । सातौं नम्बरमा परेको छ क्यालिफोर्निया इन्स्टीच्युट अफ टेक्नोलोजी । त्यस्तै आठौं नम्बरमा ड्युक युनिभर्सिटी र नवौं नम्बरमा ब्राउन युनिभर्सिटी परेको छ । त्यस्तै जोन हप्किन्स युनिभर्सिटी र नर्थवेष्टर्न युनिभर्सिटीले नवौं स्थान सुरक्षित गर्न सफल भएका छन् ।
न्युयोर्कका कुनै पनि युनिभर्सिटी टप टेनमा भने परेनन् । यद्यपी टप १०० मा पर्ने न्युयोर्कका युनिभर्सिटीहरुमा पहिलो नम्बरमा भने कोलम्बिया युनिभर्सिटी र कोर्नेल युनिभर्सिटी परेका छन् । त्यस्तै न्युयोर्क युनिभर्सिटी न्युयोर्कका युनिभर्सिटीहरुमा तेश्रोमा परेको छ भने युनिभर्सिटी अफ रोचेष्टर चौथोमा परेको छ । न्युयोर्कका युनिभर्सिटीहरुमा पाँचौंमा स्टोनी ब्रुक युनिभर्सिटी, छैठौमा रेन्ससेलर पोलिटेक्निक इन्स्टीच्युट, सातौंमा सिराकस युनिभर्सिटी, आठौंमा बिंघमटन युनिभर्सिटी, नवौंमा युनिभर्सिटी अफ बफेलो, दशौंमा फोर्डम युनिभर्सिटी र एघारौंमा रोचेस्टर इन्स्टीच्युट अफ टेक्नोलोजी परेका छन् ।
युएस न्यूजका कार्यकारी अध्यक्ष र सीईओ एरिक गर्टलरले यस वर्षको कार्यप्रणालीमा भएका महत्त्वपूर्ण परिवर्तनहरूबाट विद्यार्थीहरूले कलेजहरू तुलना गर्ने र उनीहरूका लागि उपयुक्त हुने विद्यालय चयन गर्ने कुरा सुनिश्चित गर्न सहज हुने विश्वास लिएका छन् । राष्ट्रका शीर्ष समग्र कलेजहरूको हकमा २०२२ देखि २०२३ सम्मको सुचीमा खासै परिवर्तन भएको छैन । पहिलेजस्तै प्रिन्सटन युनिभर्सिटी र म्यासाचुसेट्स इन्स्टिच्युट अफ टेक्नोलोजीले पहिलो र दोश्रो तथा हार्वर्ड युनिभर्सिटी र स्ट्यानफोर्ड युनिभर्सिटीले तेश्रोमा बराबरी गरेका छन् ।
१०० युनिभर्सिटीको सम्पूर्ण सुची हेर्न यहाँ क्लीक गर्नुहोला ।