अमेरिकामा रहेको नेपाली दूतावासको पहलमा तीनजना नेपाली महिलाको उद्दार
प्रकाशित मिति : भाद्र ५, २०८० मंगलबार
अमेरिकामा रहेको नेपाली दूतावासको पहलमा तीनजना नेपाली महिलाको उद्दार गरिएको छ । दूतावासले रिपब्लिक अफ ट्रिनिडाड एण्ड टोबागोमा फसेका तीनजना नेपाली महिलाहरु सेरसाङ तामाङ, तीर्था लामा बाइबा र याङजेन शेर्पाको उद्दार गरेको हो ।
दूतावासका अनुशार उनीहरु विगत एकमहिनादेखि त्यहाँ अलपत्र परेका थिए । तामाङलाई अगस्त २१ मा नेपाल फिर्ता पठाइएको छ भने उनी अगस्त २३ मा नेपाल पुग्नेछिन् । अरु दुईजना महिलालाई भने बिहिबार नेपाल पठाइनेछ भने उनीहरु शनिबार नेपाल पुग्नेछन् ।
ती महिलाहरु पिआर्को इन्टरनेशनल एयरपोर्टमा अलपत्र परेका थिए । उनीहरु ट्रिनिडाड एण्ड टोबागोमा आएपछि नेपाल फर्कने टिकट रद्द भएको पाइएको थियो । त्यसपछि उनीहरुको अध्यागमन अवस्थामा समस्या आएको थियो । जसका कारण उनीहरु एयरपोर्टमा अलपत्र परेका थिए ।
दूतावासले उनीहरुको उद्दार प्रकृयामा सहयोग गरेकोमा ट्रिनिडाड एण्ड टोबागोको सरकारलाई धन्यवाद दिएको छ । दूतावासले ट्रिनिडाड एण्ड टोबागोमा रहेका तेज बहादुर लामालाई पनि धन्यवाद दिएको छ, जसले ती महिलाकाबारेमा दूतावासलाई जानकारी दिएका थिए ।
नेपाली दूतावासले क्यारेबियन देशहरूमा पर्यटन र अन्य उद्देश्यका लागि जान चाहने नेपाली नागरिकहरूलाई उनीहरूको भ्रमणको उद्देश्य उनीहरूले जारी गरेको भिसाको श्रेणीसँग मिल्दोजुल्दो सुनिश्चित गर्न आवश्यक कदम चाल्न आग्रह गरेको छ।