अमेरिकाबाहिर हुने ग्रिनकार्डवाहकका परिवारलाई ग्रिनकार्ड पाउन ५ बर्ष ९ महिना
प्रकाशित मिति : श्रावण २४, २०८० बुधबार
अमेरिकी सरकारको विदेश मन्त्रालय ब्यूरो अफ कन्सुरल अफेयर्सले जारी गरेको सेप्टेम्बरको भिसा बुलेटिन अनुशार ग्रिनकार्डवाहकका दम्पत्ति र २१ बर्ष नपुगेका छोराछोरीको ग्रिनकार्ड सेप्टेम्बरमा करेन्ट नहुने भएको छ । अर्थात् अमेरिकामा हुने ग्रिनकार्डवाहकका दम्पत्ति र छोराछोरीहरुले सेप्टेम्बरमा आई १३० आवेदनका साथमा एकसाथ आई ४८५ ग्रिनकार्ड आवेदन फाइल गर्न नपाउने भएका छन् ।
सेप्टेम्बर १ पछि आवेदन दिनेहरुले ग्रिनकार्ड आवेदन आई ४८५ फाइल गर्नका लागि भिसा करेन्ट हुँदासम्म प्रतिक्षा गर्नुपर्ने भएको छ । यद्यपी सेप्टेम्बर १ भन्दा अगाडि आवेदन दिनेहरुले भने आई १३० आवेदनका साथमा एकसाथ आई ४८५ ग्रिनकार्ड आवेदन फाइल गर्न पाउनेछन् । अमेरिकाबाहिर हुनेहरुका सन्दर्भमा पनि सेप्टेम्बर १ पछि फाइल गरिएका आवेदन लागि भिसा प्रकृया अगाडि बढाउनका लागि नेशनल भिसा सेन्टरले भिसा करेन्ट हुँदासम्म प्रतिक्षा गर्नेछ ।
यद्यपी विदेशमा रहेका ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुले ग्रिनकार्ड पाउने अवधि अहिले निकै लामो रहेको छ । भिसा बुलेटिन अनुशार १ जनवरी २०१८ भन्दा अगाडि प्राथमिकता मिति भएका ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुले सेप्टेम्बरमा ग्रिनकार्ड पाउनेछन् । अर्थात् अमेरिकाबाहिर हुने ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुले ग्रिनकार्ड पाउने लाग्ने अवधि ५ बर्ष ९ महिना रहेको छ । अगस्तमा ५ बर्ष ६ महिना रहेकोमा सेप्टेम्बरका लागि भने ३ महिना घटेको छ ।
अमेरिकाभित्रै हुनेहरुका सन्दर्भमा परिवारमा आधारित अन्य श्रेणीको ग्रिनकार्ड फाइल गर्ने प्राथमिकता मिति भने अगस्तको तुलनामा सेप्टेम्बरमा पनि टसमस भएको छैन । अमेरिकाबाहिर हुनेहरुका सन्दर्भमा पनि अगस्ताको तुलनामा ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुको एफटु ए बाहेक परिवारमा आधारित अन्य श्रेणीमा ग्रिनकार्ड पाउने मितिमा टसमस नहुँदा ग्रिनकार्ड पाउन लाग्ने समय अझ ढिलो भएको छ ।
सेप्टेम्बरको भिसा बुलेटिन अनुशार अमेरिकी नागरिकका अविवाहित छोराछोरीहरुले ग्रिनकार्ड पाउनका लागि लाग्ने अवधि ८ बर्ष ८ महिना रहेको छ । यदि तपाईको आई १३० आवेदन युएससीआईएसबाट स्वीकृत भएर नेशनल भिसा सेन्टरमा पुगेको छ भने १ सेप्टेम्बर २०१७ भन्दा अगाडि प्राथमिकता मिति भएको आवेदनलाई सेप्टेम्बरमा नेशनल भिसा सेन्टरले अगाडि बढाउनेछ ।
ग्रिनकार्डवाहकका २१ बर्ष नाघेका अविवाहित छोराछोरीका लागि ग्रिनकार्ड पाउने लाग्ने अवधि ८ बर्ष पुगेको छ । यदि तपाईको आई १३० आवेदन युएससीआईएसबाट स्वीकृत भएर नेशनल भिसा सेन्टरमा पुगेको छ भने १ जनवरी २०१७ भन्दा अगाडि प्राथमिकता मिति भएको आवेदनलाई सेप्टेम्बरका नेशनल भिसा सेन्टरले अगाडि बढाउनेछ ।
अमेरिकी नागरिकका विवाहित छोराछोरीका लागि पनि ग्रिनकार्ड पाउने लाग्ने अवधि निकै लामो छ । सेप्टेम्बरको भिसा बुलेटिन अनुशार यो अवधि १४ बर्ष ९ महिना रहेको छ । यदि तपाईको आई १३० आवेदन युएससीआईएसबाट स्वीकृत भएर नेशनल भिसा सेन्टरमा पुगेको छ भने १ मार्च २०१० भन्दा अगाडि प्राथमिकता मिति भएको आवेदनलाई सेप्टेम्बरमा नेशनल भिसा सेन्टरले अगाडि बढाउनेछ ।
अमेरिकी नागरिकका दाजुभाई दिदीबहिनीहरुका लागि ग्रिनकार्ड पाउन लाग्ने अवधि १६ बर्ष ५ महिना रहेको छ । यदि तपाईको आई १३० आवेदन युएससीआईएसबाट स्वीकृत भएर नेशनल भिसा सेन्टरमा पुगेको छ भने १ मार्च २००८ भन्दा अगाडि प्राथमिकता मिति भएको आवेदनलाई सेप्टेम्बरमा नेशनल भिसा सेन्टरले अगाडि बढाउनेछ ।
अमेरिकाभित्रै हुनेहरुका सन्दर्भमा भने १ सेप्टेम्बर २०१७ भन्दा अगाडि प्राथमिकता मिति हुने अमेरिकी नागरिकका अविवाहित छोराछोरीहरु, १ जनवरी २०१७ भन्दा अगाडि प्राथमिकता मिति हुने ग्रिनकार्डवाहकका २१ बर्ष नाघेका अविवाहित छोराछोरीहरु, १ मार्च २०१० भन्दा अगाडि प्राथमिकता मिति हुने अमेरिकी नागरिकका विवाहित छोराछोरी र १ मार्च २००८ भन्दा अगाडि प्राथमिकता हुने अमेरिकी नागरिकका दाजुभाई दिदीबहिनीहरुले सेप्टेम्बरमा ग्रिनकार्ड आवेदन आई ४८५ फाइल गर्न सक्नेछन् ।