ट्रम्पको आक्रोश -‘हामीले युरोपलाई सबथोक दिने, हामीलाई त्यहाँ जान शुल्क तिर्नुपर्ने !’
प्रकाशित मिति : श्रावण १०, २०८० बुधबार
Photo by Global Residence Index
पूर्व राष्ट्रपति डोनाल्ड ट्रम्पले अर्को वर्ष ह्वाइट हाउसमा निर्वाचित भएमा अमेरिकी यात्रुहरूका लागि युरोपले लगाउने योजना बनाएको प्रवेश शुल्कको अन्त्य गर्ने बताएका छन्। अमेरिकी नागरिकले २०२४ देखि युरोप जानका लागि शुल्क तिर्नुपर्ने प्रावधान ल्याउन लागिएकोमा ट्रम्पले विरोध गरेका हुन् ।
उनले सामाजिक सञ्जाल ट्रुथ सोसलमा पोष्ट गर्दै भनेका छन् – ‘वाह, अमेरिकी नागरिकहरूले २०२४ देखि युरोप भ्रमण गर्न भिसाको लागि शुल्क तिर्नुपर्ने ! यसको बारेमा सोचौं । हामीले तिनीहरूलाई सैन्य सुरक्षा र व्यापार सहित सबै चीज दिइरहेका छौं । अब हामीले त्यहाँ जान उनीहरूलाई शुल्क तिनुपर्ने ! अमेरिकाको कुनै सम्मानै छैन! म राष्ट्रपतिको हैसियतमा यो हुन दिन्न। यो धेरै चाँडै समाप्त हुनेछ ।’
ट्रम्पले प्रवेश शुल्कलाई कसरी अन्त्य गर्ने भन्ने बारे अरु थप केही बताएका छैनन् । अमेरिकी यात्रुहरूसहित ६० भन्दा बढी अन्य देशका नागरिकहरुले ३० युरोपेली देशहरूमध्ये कुनै पनि देशको भ्रमण गर्दा २०२४ देखि युरोपेली यात्रा सूचना र प्राधिकरण प्रणालीमा आवेदन पेश गर्नुपर्नेछ। प्रवेश शुल्कबाट छुट नभएका ती ६० देशहरूमध्ये कुनैपनि देशका यात्रीले १८० दिनको अवधिमा ९० दिनसम्मको छोटो अवधिको बसाइको लागि आवेदन पेश गर्नुपर्नेछ ।
आवेदकहरूले आफ्नो नाम, जन्म मिति, राष्ट्रियता, ठेगाना, इमेल ठेगाना, फोन नम्बर र आफ्ना आमाबुवाको नाम जस्ता व्यक्तिगत जानकारी उपलब्ध गराउनु पर्ने हुन्छ। आवेदकहरूले आफ्नो हालको पेशा, शिक्षाको स्तर र युरोप जानको लागि उनीहरूको यात्रा योजनाहरूको बारेमा जानकारी पेश गर्न आवश्यक हुनेछ।
वैध यात्रा प्राधिकरणको साथ यात्रुले यी युरोपेली देशहरूको क्षेत्रमा छोटो अवधिको बसाइको लागि चाहे जति पटक प्रवेश गर्न सक्नेछन् । सामान्यतया कुनै पनि १८० दिनको अवधिमा ९० दिनसम्ममात्र बस्न पाइनेछ । यद्यपि यसले प्रवेशको ग्यारेन्टी गर्दैन। यात्रुहरु त्यहाँ पुगेपछि एक सीमा रक्षकले राहदानी र अन्य कागजातहरू हेर्न र यात्रुले प्रवेशका सर्तहरू पूरा गरेको प्रमाणित गर्न लगाउन सक्नेछन् ।
यात्रा प्राधिकरण प्राप्त गर्न लागत ७ यूरो, वा लगभग ८ डलर छ। प्रयोग गरिएको खण्डमायो छोटो अवधिको बसाइका लागि मान्य हुन्छ। यदि प्रयोग नगरिएको खण्डमा यो तीन वर्षसम्म मान्य हुन्छ जबसम्म पहिले नै पासपोर्टको म्याद समाप्त हुँदैन।