एकबर्षमा २५३६ नेपालीले पाए रोजगारमा आधारित ग्रिनकार्ड, असाधारण क्षमताको ग्रिनकार्ड पाउने ९९
प्रकाशित मिति : श्रावण ५, २०८० शुक्रबार
गत आर्थिक बर्ष २०२२ मा २५३६ जना नेपालीहरुले रोजगारमा आधारित अमेरिकाको आप्रवासी भिसा र ग्रिनकार्ड प्राप्त गरेका छन् । यो संख्या अघिल्लो बर्षको तुलनामा उल्लेख्य बृद्धि हो । अघिल्लो बर्ष २०२१ मा १६५२ जना नेपालीहरुलेमात्र रोजगारमा आधारित अमेरिकाको आप्रवासी भिसा र ग्रिनकार्ड प्राप्त गरेका थिए ।
२०२२ मा ९९ जना नेपालीहरुले अमेरिकाको रोजगारमा आधारित पहिलो श्रेणीको एक्स्ट्राअर्डिनरी ग्रिनकार्ड ईबी वान अन्तरगत आप्रवासी भिसा र ग्रिनकार्ड प्राप्त गरेको अमेरिकी विदेश मन्त्रालय ब्यूरो अफ कन्सुलर अफेयर्सले जनाएको छ । यो संख्या दूतावासहरुबाट भिसा लिएर आउनेहरु र अमेरिकामा नै स्टाटस एडजस्ट गर्नेहरुको हो । यीमध्ये अमेरिकी दूतावासबाट भिसा लगाएर आउनेहरु ५७ जना थिए भने बाँकीले अमेरिकामा नै एडजस्ट गरेका थिए । यो श्रेणीमा ग्रिनकार्ड पाउने विज्ञान, कला, शिक्षा, विजनेश खेलकुद लगायतका क्षेत्रमा असाधारण योग्यता भएको प्रमाणित गर्नुपर्छ । साथै उत्कृष्ट प्रोफेशर र शोधकर्ताहरु तथा निश्चित बहुराष्ट्रिय प्रबन्धक र कार्यकारीहरुले पनि यो श्रेणीमा ग्रिनकार्ड पाउनसक्छन् ।
रोजगारमा आधारित दोश्रो श्रेणीको ग्रिनकार्ड र आप्रवासी भिसा पाउने नेपालीहरु गतबर्ष १०२७ रहेका थिए । यीमध्ये अमेरिकी दूतावासबाट भिसा लगाएर आउनेहरु ४८ जना थिए भने बाँकीले अमेरिकामा नै एडजस्ट गरेका थिए । यो श्रेणीमा ग्रिनकार्ड पाउन एड्भान्स डिग्री भएकाहरु योग्य हुन्छन् । त्यस्तै विज्ञान, कला वा व्यवसायमा असाधारण क्षमता भएकाहरु पनि यो श्रेणीको ग्रिनकार्डका लागि योग्य हुन्छन् ।
तेश्रो श्रेणीको स्कील्ड ग्रिनकार्ड र आप्रवासी भिसा पाउने नेपालीहरु १११८ रहेका थिए । यीमध्ये अमेरिकी दूतावासबाट भिसा लगाएर आउनेहरु २८६ जना थिए भने बाँकीले अमेरिकामा नै एडजस्ट गरेका थिए । यो श्रेणीमा ग्रिनकार्ड पाउनका लागि दक्ष कामदार हुनुपर्छ वा पेशाकर्मी हुनुपर्छ ।
तेश्रो श्रेणीको अन स्कील्ड ग्रिनकार्ड र आप्रवासी भिसा पाउनेहरु भने जम्मा १९८ जना थिए । यीमध्ये अमेरिकी दूतावासबाट भिसा लगाएर आउनेहरु ४७ जना थिए भने बाँकीले अमेरिकामा नै एडजस्ट गरेका थिए । यो श्रेणीमा कुनै दक्षता नभएकाहरुले पनि ग्रिनकार्ड प्राप्त गर्न सक्छन् । २ बर्षभन्दा कमको अनुभवले पनि काम गर्ने साधारण कामबाट यो ग्रिनकार्ड प्राप्त गर्न सकिन्छ । जसमा डिसवासर वा अन्य त्यस्तै प्रकारका कामहरु समेत पर्छन् ।
रोजगारमा आधारित चौथो श्रेणीको ग्रिनकार्ड र आप्रवासी भिसा पाउने नेपालीहरु ९४ जना थिए । यीमध्ये अमेरिकी दूतावासबाट भिसा लगाएर आउनेहरु ५८ जना थिए भने बाँकीले अमेरिकामा नै एडजस्ट गरेका थिए । यो श्रेणीमा ग्रिनकार्ड पाउनका लागि धार्मिक कार्यकर्ता, विशेष आप्रवासी, जीफोर अन्तर्राष्ट्रिय संगठन वा नाटो ६ का कर्मचारी वा रिटायर्डहरु, विदेशमा रहेका अमेरिकी सरकारका कर्मारीहरु, अमेरिकी सशस्त्र बलका सदस्यहरु लगायत योग्य हुन्छन् । पाँचौ श्रेणीमा भने कसैले पाएनन् । यो श्रेणीमा ग्रिनकार्ड पाउनका लागि अमेरिकामा मोटो रकम लगानी गर्नुपर्छ ।