भारतको ओडिशा रेल दुर्घटना : अहिले सम्म के-के भयो ? कसरी भएको थियो भयानक दुर्घटना ?
प्रकाशित मिति : जेष्ठ २१, २०८० आईतबार
ओडिशाको बालासोर जिल्ला नजिकै शुक्रबार साँझ ७ बजे एक भयानक रेल दुर्घटना भएको थियो, जसमा अहिलेसम्म २८८ जनाको मृत्यु भएको पुष्टि भएको छ भने करिब ८०० जना घाइते भएका छन्। दुर्घटनास्थलमा उद्धार कार्य सकिएको छ । घाइतेहरुको विभिन्न अस्पतालमा उपचार भइरहेको छ । यससँगै ट्र्याक मर्मतको काम पनि जारी छ ।
शनिबार राति नै विभिन्न टोलीका सयौं व्यक्ति मर्मत कार्यमा जुटेका थिए । घटनालगत्तै रेलमन्त्री आफैं घटनास्थलमा पुगेर कामको अनुगमन गरिरहेका छन् । आइतबार बिहान समाचार एजेन्सी एएनआईसँग कुरा गर्दै रेलमन्त्रीले दुर्घटनाको अनुसन्धान पूरा भएको र मुख्य कारण पनि पत्ता लागेको बताए।
उनले भने, “अनुसन्धान पूरा भइसकेको छ, कमिश्नर (रेल सुरक्षा) ले आफ्नो पूर्ण छानबिन प्रतिवेदन यथाशीघ्र दिनेछ। यो प्रतिवेदन आएपछि सबै तथ्य थाहा हुनेछ, तर यस्तो दर्दनाक दुर्घटनाको मूल कारण थाहा भएको छ।”
आइतवार स्वास्थ्य मन्त्री मनसुख मण्डाविया ओडिशा रेल दुर्घटनामा घाइतेहरूलाई दिइने चिकित्सा सहायताको समीक्षा गर्न जाँदैछन्। कांग्रेस नेता अधीर रञ्जन चौधरी पनि आइतबार बिहान घटनास्थल पुगेका छन् । सञ्चारकर्मीसँग कुरा गर्दै उनले उद्धारमा लागेका सबै टोलीको प्रशंसा गरेका छन् ।
कसरी भयो दुर्घटना ?
ओडिशामा तीनवटा रेल एकआपसमा ठोक्किएर दुर्घटना भएको हो ।
१२८४१ – कोरोमण्डल एक्सप्रेस शालिमार (हावडा नजिक) बाट चेन्नई गइरहेको थियो
१२८६४ – सर एम. विश्वेश्वरय्या – हावडा सुपरफास्ट एक्सप्रेस ट्रेन यशवंतपुरबाट हावडा जाँदै थियो।
मालगाडी बहानागा बजार स्टेशनमा उभिएको थियो ।
कोरोमण्डल एक्सप्रेसले पछाडीबाट गुडिरहेको मालगाडीलाई ठक्कर दिँदा यो दुर्घटना भएको हो । रेलवेको प्राविधिक भाषामा यसलाई हेड अन कोलिजन भनिन्छ। यस्ता दुर्घटनाहरू प्राय: विरलै देखिएका छन्।
यस दुर्घटनामा कोरोमण्डल एक्सप्रेसका १२ वटा डिब्बा पटरीबाट खसेका छन् । ती मध्ये केही कोचहरू अर्को ट्र्याकमा गए। बेंगलुरुबाट आउँदै गरेको यशवंतपुर–हावडा एक्सप्रेस त्यही समयमा अर्को ट्र्याकमा हिडिरहेको थियो ।
दुर्घटनापछि अर्को ट्र्याकमा गएको कोरोमण्डल एक्सप्रेसको डब्बा गुडिरहेको यशवंतपुर–हावडा एक्सप्रेससँग ठोक्किएको थियो । यससँगै यो भयानक दुर्घटना भयो ।
अखिल भारतीय रेलवे पुरुष महासंघका महासचिव शिव गोपाल मिश्रले बीबीसीलाई भनेका छन् – ‘कुनै प्राविधिक गडबडीका कारण कोरोमण्डल एक्सप्रेसलाई ग्रीन सिग्नल दिइएको थियो वा प्राविधिक गडबडीका कारण रेल मुख्य लाइन छोडेर लुप लाइनमा गएको थियो। जसमा दुर्घटना भएको हो ।’
दुर्घटनाको भोलिपल्ट बिहान प्रधानमन्त्री नरेन्द्र मोदीले दिल्लीमा समीक्षा बैठक लिए र त्यसपछि घटनास्थल पुगेर उद्धार कार्यको बारेमा जानकारी लिएका थिए । यस क्रममा प्रधानमन्त्री मोदी मोबाइल फोनमा कसैसँग कुरा गरिरहेको पनि देखियो । उनीसँगै रेलमन्त्री अश्विनी वैष्णव र केन्द्रीय शिक्षामन्त्री धर्मेन्द्र प्रधान पनि उपस्थित थिए।
क्षतिपूर्तिको घोषणा
रेलमन्त्री अश्विनी वैष्णवले मृतकका आफन्तलाई १० लाख, गम्भीर घाइतेलाई २ लाख र सामान्य घाइतेलाई ५० हजार रुपैयाँ दिने घोषणा गरेका छन् ।
पीएमओले प्रधानमन्त्री दैवी प्रकोप राहत कोषबाट मृतकका आफन्तलाई २ लाख र घाइतेलाई ५० हजार रुपैयाँ दिने घोषणा गरेको छ ।
यसबाहेक ममता बनर्जीले पश्चिम बंगालका जनतालाई पाँच लाख रुपैयाँ क्षतिपूर्ति दिने घोषणा गरेकी छन्। तमिलनाडुका मुख्यमन्त्री एमके स्टालिनले मृतकका परिवारलाई ५ लाख र घाइतेलाई १ लाख रुपैयाँ दिने घोषणा गरेका छन् ।