प्रधानमन्त्री मोदीद्वारा रेल दुर्घटनास्थलको अवलोकन, पीडित परिवारलाई सहयोग गर्न आग्रह
प्रकाशित मिति : जेष्ठ २०, २०८० शनिबार
प्रधानमन्त्री नरेन्द्र मोदीले आज ओडिशाको बालासोर पुगेर रेल दुर्घटनास्थलको अवलोकन गरेका छन्। उनले रेलमन्त्री अश्विनी वैष्णव केन्द्रीय मन्त्री धर्मेन्द्र प्रधानसँग जानकारी लिए।
समाचार एजेन्सी एनआईका अनुसार घटनास्थलबाट उनले क्याबिनेट सचिव र स्वास्थ्यमन्त्रीलाई फोन गरेर पीडित परिवारलाई सक्दो सहयोग गर्न आग्रह गरेका थिए। लगत्तै उनले अस्पताल पुगेर घाइतेको अवस्थाबारे जानकारी लिएका थिए ।
अस्पताल पुगेपछि सञ्चारकर्मीहरुलाई प्रतिक्रिया दिँदै उक्त घटना सरकारका लागि गम्भीर रहेको उल्लेख गरे । मोदीले भने, ‘आफन्त गुमाएकाहरुको दुःखमा सरकार सहभागी छ । घटना सरकारका लागि निकै गम्भीर छ। हरेक किसिमको छानबिन गर्न निर्देशन दिइएको छ । दोषी पाइएमा कडा भन्दा कडा सजाय हुनेछ ।’
प्रधानमन्त्री मोदीले दुर्घटनामा गुमाएका परिवारका सदस्यहरुलाई फिर्ता ल्याउन नसके पनि उनीहरुको दुखमा सरकार साथमा रहेको बताएका छन् । दुर्घटनामा घाईते भएका परिवारका सदस्यहरुको उपचारको लागि सरकारले कुनै कसर बाँकी नराख्ने विश्वास दिलाए ।
मोदीले घटनाको छानबिन गर्न निर्देशन दिइएको बताउँदै कोही दोषी ठहर भए कडा भन्दा कडा कारबाही गर्ने बताए ।