नक्कली भुटानी शरणार्थी प्रकरण: सरकारी वकिल कार्यालयमा प्रहरीले बुझायो प्रतिवेदन
प्रकाशित मिति : जेष्ठ ८, २०८० सोमबार
जिल्ला प्रहरी परिसर काठमाडौंले नक्कली भुटानी शरणार्थी प्रकरणको अनुसन्धान प्रतिवेदन सरकारी वकिलको कार्यालयमा बुझाएको छ । नेपाली नागरिकलाई नक्कली भुटानी शरणार्थी बनाएर अमेरिका पठाइदिने भन्दै करोडौं असुली गर्ने प्रयासमा कम्तिमा ३२ जना संलग्न रहेको निष्कर्ष सहित रायसहितको अनुसन्धान प्रतिवेदन वकिलको कार्यालयमा बुझाएको प्रहरीले जनाएको छ ।
यो प्रकरणमा मुछिएका ३२ जनामध्ये १६ जना प्रहरी हिरासतमा छन् । थप १६ जनालाई फरार प्रतिवादीका रुपमा प्रतिवेदनमा समावेश गरिएको छ ।
यस प्रक्ररण नेकपा एमालेका नेता एवम् पूर्वउपप्रधानमन्त्री टोपबहादुर रायमाझी, नेपाली कांग्रेसका नेता एवम् पूर्वगृहमन्त्री बालकृष्ण खाँण, तत्कालीन गृहसचिव टेकनारायण पाण्डे, भुटानी शरणार्थी नेता टेकनाथ रिजाल, तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई, हज समितिका अध्यक्ष शमशेर मियाँ, पूर्वसभासद् आङटावा शेर्पा, तत्कालीन गृहमन्त्री खाँणका स्वकीय सचिव नरेन्द्र केसी, टोपबहादुर रायमाझीका छोरा सन्दीप रायमाझी गरि १६ जना प्रहरीको हिरासतमा छन् ।
यस्तै, पूर्वगृहमन्त्री रामबहादुर थापा बादलका छोरा प्रतीक र इन्द्रजित राईका छोरा निरज गरि १६ जना फरार छन् । उनीहरूविरूद्ध १२५ जनाले जाहेरी दिएका छन्।