२०२३ मा १० लाखभन्दा बढी भारतीयहरूलाई भिसा जारी गर्ने अमेरिकाको लक्ष्य
प्रकाशित मिति : बैशाख ९, २०८० शनिबार
अमेरिकाले यस वर्ष भारतीयहरूलाई दश लाखभन्दा बढी भिसा जारी गर्ने लक्ष्य राखेको छ । बाइडेन प्रशासनले भारतीयहरूको लागि सबै विद्यार्थी भिसाहरू प्रकृयामा लैजाने कुरा सुनिश्चत गर्ने दक्षिण र मध्य एशियाका लागि अमेरिकी सहायक विदेशमन्त्री डोनाल्ड लुले एक अन्तर्वार्तामा बताएका छन् ।
अमेरिकाले कामदार भिसालाई पनि प्राथमिकता दिइरहेको तथा यस वर्ष १० लाखभन्दा बढी भिसा जारी गर्ने ट्रयाकमा रहेको उनले बताए । विद्यार्थी भिसा र आप्रवासी भिसाको रेकर्ड संख्यासँगै यो अमेरिकाका लागि नयाँ रेकर्ड हुने उनले बताए ।
अमेरिका जाने अन्तर्राष्ट्रिय विद्यार्थीको हिसाबले भारत अहिले विश्वमा दोस्रो नम्बरमा छ । अमेरिकाले एचवानबी र एल लगायतका कामदार भिसालाई पनि प्राथमिकता दिइरहेको तथा ती भिसाका लागि अन्तरवार्ता लिनका लागि भारतमा कन्सुलर शाखाहरुमा ६० दिनभन्दा कम समय लाग्ने उनले बताए ।
कामदारहरूको लागि भिसालाई प्राथमिकता दिने कुरा सुनिश्चित गर्ने उल्लेख गर्दै यो अमेरिकी र भारतीय अर्थतन्त्र दुवैको लागि महत्त्वपूर्ण रहेको लुले बताएका छन् । केही निश्चित पिटिशनमा आधारित गैरआप्रवासी कामदार भिसाका लागि अमेरिकामा नै भिसा नवीकरण पुन सुरु गर्ने योजना रहेको उनले जानकारी दिए ।
अमेरिकाभित्रै भिसा नविकरणका लागि यो बर्ष परीक्षण कार्यक्रम सुरु गरेको अमेरिकी सरकारको योजना रहेको छ । यसले निश्चित आवेदकहरूलाई उनीहरूको भिसा नवीकरण गर्न विदेश जाने आवश्यकतालाई हटाउनेछ ।