रोजगारमा आधारित तेश्रो श्रेणीको ग्रिनकार्ड मे मा करेन्ट नहुने, दोश्रो श्रेणीको सर्यो ५ महिना पछाडि
प्रकाशित मिति : बैशाख २, २०८० शनिबार
रोजगारमा आधारित तेश्रो श्रेणीको ग्रिनकार्ड आगामी मे महिनामा करेन्ट नहुने भएको छ । अमेरिकी विदेश मन्त्रालय ब्यूरो अफ कन्सुलर अफेयर्सको नयाँ भिसा बुलेटिन अनुशार मे महिनाका लागि रोजगारमा आधारित तेश्रो श्रेणीको ग्रिनकार्ड फाइल गर्नका लागि पनि प्राथमिकता मिति तोकिएको छ ।
मे महिनामा १ जुन २०२२ भन्दा अगाडि प्राथमिकता मिति भएकाहरुलेमात्र ग्रिनकार्ड आवेदन आई ४८५ फाइल गर्न पाउनेछन् । २ बर्षको अनुभवको आवश्यकता पर्ने दक्ष कामदारका सन्दर्भमा यस अगाडि भिसा करेन्ट रहदै आएको थियो ।
त्यस्तै तेश्रो श्रेणीको २ बर्षको योग्यता नचाहिने अन्य श्रेणीको ग्रिनकार्डका लागि पनि मे महिनामा १ जनवरी २०२० को प्राथमिकता मिति तोकिएको छ । रोजगारमा आधारित दोश्रो श्रेणीको ग्रिनकार्डका लागि १५ फरबरी २०२२ को प्राथमिकता मिति तोकिएको छ । यो मिति अप्रिलका लागि १ जुलाई २०२२ रहेकोमा मे महिनामा ५ महिना अझ पछाडि सरेको छ ।
रोजगारमा आधारित पहिलो श्रेणीको ग्रिनकार्डका लागि भने भिसा करेन्ट रहेको छ । अमेरिकाभित्र हुनेले पहिलो श्रेणीको ग्रिनकार्डका लागि आई १४० का साथमा आई ४८५ फाइल गर्न पाउनेछन् भने अमेरिकाबाहिर हुनेहरुले पनि भिसा करेन्ट हुने प्रतिक्षा गर्नुपर्ने छैन ।
अझै थपियो परिवारमा आधारित ग्रिनकार्ड पाउन लाग्ने अवधि
परिवारमा आधारित सबै श्रेणीका ग्रिनकार्ड पाउन लाग्ने अवधि अप्रिलका तुलनामा मे महिनामा एकमहिना थपिएको छ । अमेरिकी विदेश मन्त्रालय ब्यूरो अफ कन्सुलर अफेयर्सले मे महिनाको भिसा बुलेटिन जारी गर्दै ग्रिनकार्ड जारी हुने मिति अप्रिल महिनाकै कायम राखेको हो ।
मे मा परिवारमा आधारित ग्रिनकार्ड फाइल गर्न पाउने मितिमा भने केही फेरबदल भएको छ । तर ग्रिनकार्ड पाउने मिति २०२१ को सेप्टेम्बरदेखि नै जस्ताको तस्तै रहँदा परिवारमा आधारित श्रेणीका ग्रिनकार्डका लागि लाग्ने अवधि बढेको बढ्यै छ । ग्रिनकार्ड पाउनका लागि २०२१ को सेम्टेम्बरमा जुन मिति कायम थियो अहिले पनि त्यही मिति कायम छ ।
जसको अर्थ परिवारमा आधारित विभिन्न श्रेणीको ग्रिनकार्ड पाउने लाग्ने समय र अमेरिकामा नै हुनेहरुले फाइल गर्नका लागि लाग्ने गतबर्षको सेप्टेम्बरको तुलनामा १९ महिना बढेको छ । अमेरिकी नागरिकका २१ बर्ष काटेका अविवाहित छोराछोरी, ग्रिनकार्डवाहकका २१ बर्ष काटेका अविवाहित छोराछोरी, अमेरिकी नागरिकका विवाहित छोराछोरीहरु र अमेरिकी नागरिकका दाजुभाई दिदीबहिनीहरुका सन्दर्भमा ग्रिनकार्ड पाउने मितिमा कुनै फेरवदल नभएको हो ।
ग्रिनकार्ड बाहकका दम्पत्ति र २१ बर्ष नकाटेका छोराछोरीका सन्दर्भमा भने भिसा करेन्ट रहेको छ । साथै उनीहरुले ग्रिनकार्ड पाउने मिति पनि करेन्ट रहेको छ । जसको अर्थ अमेरिकाबाहिर रहेका ग्रिनकार्ड बाहकका दम्पत्ति र २१ बर्ष नकाटेका छोराछोरीका सन्दर्भमा नेशनल भिसा सेन्टरले भिसा करेन्ट हुने मिति प्रतिक्षा नगरी सिधै प्रकृया अगाडि बढाउँछ । अमेरिकाभित्रै हुने ग्रिनकार्ड बाहकका दम्पत्ति र २१ बर्ष नकाटेका छोराछोरीका सन्दर्भमा आई १३० फर्मका साथमा ग्रिनकार्ड आवेदन आई ४८५ फाइल गरेर वर्क परमिट र ट्राभल डकुमेन्ट प्राप्त गर्नसकिन्छ । साथै अध्यागमन स्टाटस जोगाउने झन्झट पनि हुँदैन ।
मे महिनाको भिसा बुलेटिन अनुशार अमेरिकी नागरिकका २१ बर्ष काटेका अविवाहित छोराछोरीले ग्रिनकार्ड पाउन लाग्ने अवधि ८ बर्ष ५ महिना पुगेको छ । ग्रिनकार्डवाहकका २१ बर्ष काटेका अविवाहित छोराछोरीका लागि ग्रिनकार्ड पाउन लाग्ने अवधि पनि ७ बर्ष ८ महिना पुगेको छ । अमेरिकी नागरिकका विवाहित छोराछोरीहरुले ग्रिनकार्ड पाउन लाग्ने अवधि १४ बर्ष ६ महिना पुगेको छ भने अमेरिकी नागरिकका दाजुभाई दिदीबहिनीहरुका सन्दर्भमा ग्रिनकार्ड पाउन लाग्ने अवधि १६ बर्ष २ महिना पुगेको छ ।
अमेरिका भित्र हुनेहरुका लागि भने अमेरिकी नागरिकका २१ बर्ष काटेका अविवाहित छोराछोरी र ग्रिनकार्डवाहकका २१ बर्ष काटेका अविवाहित छोराछोरीको सन्दर्भमा १ जनवरी २०१७ भन्दा अगाडि प्राथमिकता मिति हुनेले मे महिनामा ग्रिनकार्ड आवेदन दिन सक्नेछन् । अमेरिकी नागरिकका विवाहित छोराछोरीहरुका सन्दर्भमा ८ फरबरी २०१० भन्दा अगाडि प्राथमिकता मिति हुनेले मे महिनामा ग्रिनकार्ड आवेदन दिन सक्नेछन् भने अमेरिकी नागरिकका दाजुभाई दिदीबहिनीहरुका सन्दर्भमा १ फरबरी २००८ भन्दा अगाडि प्राथमिकता मिति हुनेले मे महिनामा ग्रिनकार्ड आवेदन दिन सक्नेछन् । नेशनल भिसा सेन्टरले पनि सोही आधारमा भिसा प्रकृया अगाडि बढाउनेछ ।
जुनका लागि थपिएन डिभी विजेता नेपालीको केस नम्बर
अमेरिकी सरकारको विदेश मन्त्रालय ब्यूरो अफ कन्सुलर अफेयर्सले सार्वजनिक गरेको भिसा बुलेटिन अनुशार जुन महिनाका लागि पनि डिभी विजेता नेपालीहरुलाई १७ हजार ७ सय ७५ सम्म केस नम्बरमा सिमित गरिएको छ । अर्थात जुनका लागि केस नम्बर थपिएको छैन ।
मे महिनाका लागि पनि १७ हजार ७ सय ७५ सम्म केस नम्बर हुने नेपालीको डाइभर्सिटी भिसा करेन्ट रहेको छ । अप्रिलका लागि यो नम्बर १२ हजार ६ सय रहेको छ ।
जनवरीका लागि नेपालीहरुको केस ५५ सय रहेकोमा फेब्रुअरीका लागि १५ सय थपेर ७ हजार बनाइएको थियो भने मार्चका लागि ८ हजार २५ रहेको रहेको थियो । डिसेम्बरका लागि भने नेपालीहरुको केस नम्बर १७ सय मात्र रहेको थियो । अक्टोबरमा १४५० सम्म केस नम्बर हुने नेपाली डिभी विजेताहरुले भिसा पाउनसक्नेगरी सिमाबन्दी तोकिएकोमा नोभेम्बरका लागि समेत सोही सिमाबन्दी कायम रहेको थियो ।
डिभी २०२३ का विजेताहरुले अक्टोबरदेखि भिसा पाउन सुरु गर्ने प्रावधान रहेतापनि अमेरिकी दूतावास काठमाडौंले अक्टोबर र नोभेम्बरमा कसैलाई पनि डाइभर्सिटी भिसा जारी गरेन । डिसेम्बरदेखि भने डिभी विजेता नेपालीहरुलाई भिसा जारी गर्न थालिएको छ ।
चालु आर्थिक बर्षका डिभी विजेताहरुले सन् २०२३ को सेप्टेम्बरभित्र भिसा पाइसक्नुपर्ने प्रावधान रहेको छ । कुल १ लाख १९ हजार २ सय ६२ जनाले डिभी लोटरी पारेकोमा अधिकतम ५५ हजारसम्मले भिसा पाउनसक्नेछन् । आर्थिक बर्ष २०२३ का डिभी विजेता नेपालीहरुको संख्या ३८०८ रहेको छ ।
डिभी २०२३ मा ९५ लाख ७० हजार २ सय ९१ जना सहभागी भएका थिए । उनीहरुले २०२१ को अक्टोबर ६ देखि नोभेम्बर ९ सम्म डिभी लोटरी भरेका थिए । अमेरिकाभित्रै हुने डिभी लोटरी विजेताहरुले युएससीआईएसमार्फत स्थीति समायोजन गरेर ग्रिनकार्ड पाउनसक्छन् भने बाहिर हुनेले कन्सुलर प्रकृयामार्फत भिसा प्राप्त गर्नेछन् ।