भारतबाहिर पठानको आक्रामक बुकिङ
प्रकाशित मिति : पुस १५, २०७९ शुक्रबार
सन् २०२२ को अन्त्य रोहित सेठ्ठीको फिल्म ‘सर्कस’बाट भयो । यो फिल्म बक्सअफिसमा फ्लप नै भयो । नयाँ वर्ष २०२३ को पहिलो महिना जनवरीको अन्त्य अर्थात जनवरी २५ मा शाहरुख खानको फिल्म ‘पठान’ रिलिज हुँदैछ । चार वर्षपछि दर्शकमाझ कमव्याक गर्न लागेका शाहरुखका लागि यो फिल्म विशेष छ ।
दीपिका पादुकोण र जोन अब्राहमको समेत अभिनय रहेको यो फिल्मको गीत रिलिज हुनासाथ विवादमा तानिएको छ । जसको चर्चा अहिले पनि बलिउडमा छ । तर, विवादका बाबजुद पनि यो फिल्म प्रति दर्शकको क्रेज घटेको छैन । यो फिल्मको भारत बाहिर बुकिङ आक्रामक छ ।
जर्मनीमा फिल्मको बुकिङ २८ डिसेम्बरबाट सुरु भएको थिया । एक महिना अघिबाट नै बुकिङ खुलेपछि केही समयमा नै सबै टिकट बिकिसकेको छ । ‘पठान’को टिकट आक्रामक रुपमा बुकिङ भएपछि यो प्रतिक्षित फिल्म हो भन्ने प्रमाणित भएको छ ।
जर्मनीको बर्लिन, एसेन, डेमटोर, हार्बर्ग, हनोवर, म्युनिख र अफेनबैकमा भएका थिएटरमा जनवरी २५ का लागि ‘पठान’को शो करिब करिब भरिएको छ ।
भारतमा जनवरीको पहिलो साताबाट बुकिङ खुल्दैछ । सिद्धार्थ आनन्दको फिल्ममा भीएफएक्स र एक्सनको जबरदस्त संयोजन छ । फिल्म हिन्दी, तमिल र तेलुगू भाषामा रिलिज हुँदैछ ।