नेपाल लगायतको टीपीएसको अवधि थप्न ५६ सांसदको पत्र राष्ट्रपति बाइडेनलाई
प्रकाशित मिति : जेष्ठ १७, २०७८ सोमबार
नेपाल लगायतको टीपीसीको अवधि थप्न र केही देशलाई टीपीएसको दर्जा प्रदान गर्न आग्रह गर्दै ५६ जना अमेरिकी सांसदले राष्ट्रपति जो बाइडेन र डिपार्टमेन्ट अफ होमल्याण्ड सेक्युरिटीका सेक्रेटरी अलेहान्द्रो मेयरकासलाई पत्र लेखेका छन् । सिनेटर बेन कार्डिन, सिनेटेर क्रिस भ्यान होल्यान र प्रतिनिधिसभा सदस्य निदिया भेलास्काजको नेतृत्वमा पत्र पठाइएको हो ।
पत्रमा कोरी बुकर, बर्नी स्याण्डर्स, एमी क्लोबुचार, एलिजाबेथ वारेन लगायत अरु १५ जना सिनेटरहरुले हस्ताक्षर गरेका छन् । प्रकोप वा हिंशाका कारण मातृभूमिमा असुरक्षित भएकाहरुलाई टीपीएस सुविधा दिन बाइडेन प्रशासन प्रतिबद्ध रहेकोमा धन्यवाद दिंदै नेपाल लगायत १७ देशलाई टीपीएसमा दर्ज गर्न वा पुन दर्ज गर्न आग्रह गरिएको छ ।
पत्रको पूर्ण पाठ यहाँ पढनुहोला ।
जनवरीको पहिलो साता नेपाल लगायतका हैटी र मध्य अमेरिकी देशका नागरिकको टीपीएसको कागजातको अवधि ९ महिना थपिएको थियो । जस अनुशार नेपाल लगायत ती देशको टीपीएसवाहकको कागजातको अवधि अक्टोबर ४, २०२१ मा समाप्त हुँदैछ ।
अमेरिकी अदालतमा रहेका विभिन्न मुद्दाका आदेशहरुको कार्यान्वयनका क्रममा टीपीएसका कागजातको अवधि थपिएको थियो । वर्क परमिट, टीपीएस नोटिस अफ एक्सन आई ७९७ र आई ९४ को अवधि स्वत थपिएको थियो ।
कागजातको म्याद थपसँगै बीचका रि रजिस्ट्रेशन अवधिमा रि रजिस्ट्रेशन गर्न छुटाएका टीपीएसवाहकलाई पनि रि रजिस्ट्रेशन गरेर टीपीएस कायम गर्नसक्ने अवशर दिइएको थियो । सन् २०१६ को अक्टोबर २६ देखि डिसेम्बर २७ सम्म र सन् २०१८ को मे २२ देखि जुलाई २३ सम्म सरकारले नेपाली टीपीएसवाहकका लागि रि रजिस्ट्रेशन खुलाएको थियो ।
यी मध्ये कुनै पनि अवधिमा राम्रोसँग रिरजिस्ट्रेशन नगरेका वा छुटेकाहरुलाई पनि रिरजिस्ट्रेशन गर्नसक्ने अवशर दिइएको थियो । तर त्यसका लागि पहिलो पटक सन् २०१५ मा भने भने टीपीएसका लागि आवेदन दिएको हुनुपर्ने प्रावधान छ ।
आगामी अक्टोबर ४ पछि नेपालीहरुको टीपीएसको अवधि के हुने हो भन्ने अझै टुंगो नहुँदा नेपाली टीपीएसवाहकहरु अन्यौलमा परेका छन् । उनीहरु पछिल्लो चरणमा अमेरिकाबाहिर यात्रा गर्नसमेत डराएका छन् ।