कोरोनाबिरुद्धको फाइजर भ्याक्सिन अब सामान्य फ्रिजको तापक्रममा १ महिना राख्न सकिने
कोरोनाबिरुद्धको फाइजर भ्याक्सिन अब सामान्य फ्रिजको तापक्रममा १ महिनासम्म भण्डारण गरेर राख्न सकिने अमेरिकाको खाद्य तथा औषधी प्रशासनले घोषणा गरेको छ । यो परिवर्तनले अब फाइजरको भ्याक्सिन डाक्टरहरुको क्लीनिकहरुमा प्राप्त गर्न, भण्डारण गर्न र वितरण गर्न सहज हुने भएको छ ।
फाइजर इन्कले उपलब्ध गराएको तथ्यांकको विश्लेषण गरेर यो भ्याक्सिनका शीशीहरु २ डिग्री सेल्सियसदेखि ८ डिग्री सेल्सियससम्म अर्थात् ३५ डिग्री फरेनहाइटदेखि ४६ डिग्री फरेनहाइटसम्म एकमहिनासम्म भण्डारण गरेर राख्न सकिने निष्कर्ष निकालिएको हो । यसभन्दा अगाडि प्रयोगका लागि तयारी अवस्थामा रहेका फाइजर भ्याक्सिन सामान्य फ्रिजको तापक्रममा ५ दिनसम्ममात्र राख्न सकिने बताइएको थियो ।
युरोपको औषधी एजेन्सीले पनि फाइजरको भ्याक्सिन सामान्य फ्रिजको तापक्रममा एकमहिनासम्म राख्न सकिने गरी स्वीकृत गरिसकेको छ । यो परिवर्तनसँगै फाइजर भ्याक्सिनको वितरण अझ व्यापक र सहज हुने अपेक्षा गरिएको छ । अमेरिकामा फाइजरसहित मोडेर्ना र जोन्सन एण्ड जोन्सनको भ्याक्सिन प्रयोग भइरहेका छन् ।
अमेरिकामा अहिलेसम्म कुल जनसंख्याको झण्डै ४८ प्रतिशत अर्थात् झण्डै १६० मिलियनले कोरोनाबिरुद्धको भ्याक्सिन लगाइसकेका छन् । जसमध्ये फाइजर भ्याक्सिन तीनसाताको अन्तरमा दुई डोज र मोडेर्ना २८ दिनको अन्तरमा दुई डोज लगाउनुपर्छ । त्यस्तै जोन्सन एण्ड जोन्सनको भ्याक्सिन भने एकडोजमात्र लगाए पुग्छ । अमेरिकामा पूर्णरुपमा भ्याक्सिन लगाउनेहरु १२५ मिलियन नाघेका छन् ।
