शिशुदेखि ७ बर्षसम्मका ५ जना कागजपत्रविहिन बालिका अमेरिकी सिमाक्षेत्रमा अलपत्र फेला
प्रकाशित मिति : बैशाख २८, २०७८ मंगलबार
शिशुदेखि ७ बर्षसम्म उमेर भएका ५ जना कागजपत्रविहिन बालिकाहरु अमेरिकी सिमाक्षेत्रमा अलपत्र फेला परेका छन् । अमेरिका र मेक्सिकोको सिमाक्षेत्रमा दक्षिण टेक्सासमा उनीहरु अभिभावकविना नै अलपत्र अवस्थामा फेला परेका हुन् ।
सबैभन्दा धेरै उमेरकी बालिका ७ बर्षकी रहेको र सबैजना बालिकाहरु रहेको अधिकारीहरुले बताएका छन् । उनीहरु कसैलाई पनि तत्कालै स्वास्थ्यसम्बन्धि कुनै समस्या भने नदेखिएको जनाइएको छ । उनीहरु सान एन्टोनियोदेखि साढेदुईघण्टा दक्षिणपश्चिममा फेला परेका हुन् ।
अलपत्र अवस्थामा त्यती साना बालिकाहरु भेटिनु अत्यन्तै हृदयविदारक रहेको डेल रियो क्षेत्रका गस्ती प्रमुख अष्टिन एल सेक्रोले बताएका छन् । ती बालिकाहरु होण्डुरस र ग्वाटेमालाका रहेको पुष्टी भएको छ ।
ती बालिकाहरुलाई डिपार्टमेन्ट अफ हेल्थ एण्ड ह्युमन सर्भिसेजमा पठाउनु अगाडि प्रकृयाका लागि लगिएको जनाइएको छ । उनीहरुका अभिभावकहरुबारे केही पत्ता लागे नलागेको बारे केही बताइएको छैन ।
डिपार्टमेन्ट अफ होमल्याण्ड सेक्युरिटीका सेक्रेटरी अलेहान्द्रो मेयरकासले सिमाक्षेत्रमा पक्राउ पर्ने आप्रवासीहरु २० बर्षकै सबैभन्दा धेरै भएको बताएका छन् । तर अभिभावकविनाको बालबालिकाहरुको संख्या भने पछिल्लो दिनमा घटेको बताइएको थियो ।
शुक्रबारसम्म सिमा सुरक्षाको हिराशतमा जम्मा ६ सय अभिभावक विनाका बालबालिकाहरु रहेको बताएको छ । मार्चमा यो संख्या ६ हजार रहेको थियो । त्यस्तै बालबालिकाहरुलाई हिराशतमा राख्ने अवधि औषतमा १३९ घण्टाबाट घटेर २४ घण्टा बनेको जनाइएको छ ।