केही अमेरिकी भिसा नविकरणमा मे १७ देखि फिंगरप्रिन्ट नचाहिने
प्रकाशित मिति : बैशाख २२, २०७८ बुधबार
अमेरिकामा बैध रुपमा काम गरिरहेका आप्रवासीहरुका केही दम्पत्तिहरुका लागि उनीहरुका भिसा नविकरणका लागि फिंगरप्रिन्ट नचाहिने भएको छ । अमेरिकी सरकारको डिपार्टमेन्ट अफ होमल्याण्ड सेक्युरिटीले उनीहरुका लागि फिंगरप्रिन्ट अनिवार्यताको नियम खारेज गरेको हो ।
यो खारेजीसँगै एचवानबी कामदार भिसामा रहेकाहरुका दम्पत्तिहरुले विना फिंगरप्रिन्ट पनि उनीहरुका भिसा नविकरण गर्न सक्ने भएका छन् । कोरोना महामारीका बीच फिंगरप्रिन्ट अनिवार्यको नियमले भिसा प्रकृयामा एकदमै ढिलाई भएको थियो ।
फिंगरप्रिन्ट अनिवार्य गर्ने प्रावधान सन् २०१९ मा ट्रम्प प्रशासनले सुरु गरेको थियो । जसका कारण दशौं हजार आप्रवासीहरुले आफ्ना वर्क परमिटहरु गुमाएको र भिसा प्रकृयामा ढिलो भएको तथ्यांक रहेको छ ।
युएससीआईएसले अदालतमा फाइल गरेको कागजातमा फिंगरप्रिन्ट अनिवार्यको प्रावधान मे १७ देखि लागु हुनेगरी २ बर्षका लागि हटाउने उल्लेख गरिएको छ । कामदार भिसावाहकका दम्पत्तिहरुले जालसाजी नगरेको प्रमाणित गर्नका लागि भिसा नविकरणमा नयाँ फिंगरप्रिन्ट आवश्यक रहेको भन्दै ट्रम्प प्रशासनले यो नियम ल्याएको थियो । अब दुईबर्ष भिसा नविकरण गर्दा पूरानै फिंगरप्रिन्टले काम चलाइनेछ ।
एचवानबी र एल वान भिसा वाहकका दम्पत्तिहरुलाई प्रतिनिधित्व गर्ने वकिलहरुले भिसा नविकरणका लागि फिंगरप्रिन्ट अनिवार्य रहेको नियमबिरुद्ध वकालत गरेका थिए । युएससीआईएसले आगामी दिनहरुमा यसबारे थप सुचनाहरु सार्वजनिक गरिने स्पष्ट पारेको छ ।
कोरोनाको महामारीका कारण अमेरिकी नागरिकता आवेदन, ग्रिनकार्ड नविकरण लगायतका कैयन आवेदनमा युएससीआईएसले अधिकांशका सन्दर्भमा पूरानै फिंगरप्रिन्ट प्रयोग गर्दै आएको छ । तर केहीलाई नयाँ फिंगरप्रिन्टका लागि समेत सुचना पठाइएको छ । त्यस्तै अमेरिकाबाहिरबाट भिजिटर लगायतका भिसा नविकरणमा पनि दूतावास र कन्सुलेटले नयाँ फिंगरप्रिन्ट नलिई पूरानैले काम चलाउँदै आएका छन् ।