भ्याक्सिन लगाएकाहरु बाहिर हुने साना जमघट र खानपिनमा विनामास्क सहभागी हुनसक्ने सीडीसी निर्देशिका
पूर्णरुपमा कोरोनाबिरुद्धको भ्याक्सिन लगाएकाहरुका लागि अमेरिकन सीडीसीले आज नयाँ निर्देशिका जारी गरेको छ । पूर्णरुपमा भ्याक्सिन लगाएकाहरुले सानातिना आउटडोर जमघटमा वा फरक फरक घरका साथीहरुसँग आउटडोर खानपिनका क्रममा मास्क हटाउन सक्ने सीडीसीको निर्देशिकामा उल्लेख छ ।
मंगलबार पत्रकार सम्मेलनमा नयाँ निर्देशिका जारी गर्दै सीडीसी निर्देशक डाक्टर रोशेल वालेन्स्कीले भनिन् – ‘यदि तपाईले पूर्णरुपमा भ्याक्सिन लगाउनुभएको छ र भ्याक्सिन लगाएका तथा नलगाएकाहरुलाई सानोतिनो आउडोर जमघटमा सहभागी हुन चाहनुहुन्छ भने वा फरक फरक घरका साथीहरुसँग आउटडोर रेष्टुरेण्टमा खानाखान चाहनुहुन्छ भने विज्ञानले देखाएको छ कि तपाईले मास्क हटाउन सक्नुहुनेछ ।’
‘सामान्यतया भ्याक्सिन लगाएकाहरुलाई मास्क विना बाह्य गतिविधि गर्नु सुरक्षित नै हुन्छ । यद्यपी हामी धेरै भ्याक्सिन नलगाएका व्यक्ति उपस्थीत हुने र सामाजिक दुरी कायम गर्न सम्भव नहुने भींडभाडयुक्त स्थलहरुमा भने मास्क लगाउन नै सल्लाह दिन्छौं ।’- वालेन्स्कीले भनिन् ।
बृहत रुपमा भ्याक्सिन लगाउने काम पूरा नभएसम्म भींडभाडयुक्त स्थलमा मास्क लगाउन सिफारिस गर्ने उनले बताइन् ।
तर पूर्णरुपमा भ्याक्सिन लगाएकाहरुका लागि पनि जीवन पहिलेजस्तै सामान्य भने भइसकेको छैन । संघीय स्वास्थ्य एजेन्सीले भ्याक्सिन लगाएकाहरुलाई पनि घरभित्र हुने ठूला जमघटहरुमा सहभागी नहुन सल्लाह दिएको छ । तर कतिजनासम्मको जमघटलाई ठूलो जमघट भन्नेबारे सीडीसीले परिभाषित गरेको भने छैन । घरबाहिर हुने ठूला जमघटमा सहभागी हुन चाहने भ्याक्सिन लगाएका व्यक्तिलाई भने मास्क लगाउन सुझाव दिइएको छ ।
मल, थियटर, म्युजियम लगायतका इन्डोर स्थलहरुमा भने भ्याक्सिन लगाएकाहरुलाई पनि मास्क लगाउन सीडीसीले सुझाव दिएको छ । पूर्णरुपमा भ्याक्सिन लगाएको भन्नाले फाइजर र मोडेर्नाको दोश्रो डोज लगाएको २ साता पूरा भइसकेको बुझ्नुपर्छ । त्यस्तै जोन्सन एण्ड जोन्सनको एउटा डोज लगाएको दुईसातापछि पनि पूर्णरुपमा भ्याक्सिन लगाएको बुझिन्छ ।
