मार्चमा अमेरिकी दूतावासबाट अमेरिकी नागरिकका परिवारका ३५४ जनालाई भिसा, डिभी विजेतालाई दिइएन
प्रकाशित मिति : बैशाख ९, २०७८ बिहीबार
नियमित भिसा सेवा सुचारु नभइसकेको अवस्थामा अमेरिकी दूतावास काठमाडौंले अमेरिकी नागरिकका दम्पत्तिको भिसालाई उच्च प्राथमिकता दिएको छ । मार्च महिनामा अमेरिकी दूतावास काठमाडौंले ४७५ जनालाई आप्रवासी भिसा जारी गरेकोमा अमेरिकी नागरिकका दम्पत्तिहरु २३३ जना र २४ जना अमेरिकी नागरिकका छोराछोरीहरु रहेका छन् ।
मार्च महिनामा काठमाडौं दूतावासबाट पेशागत तथा अन्य दक्ष कामदारका रुपमा आप्रवासी भिसा पाउनेहरु ६ जना रहेका छन् । ग्रिनकार्डवाहकका दम्पत्ति र २१ बर्ष नपुगेका छोराछोरीहरु ७८ जना तथा ग्रिनकार्डवाहकका २१ बर्ष काटेका अविवाहित छोराछोरी एकजनाले आप्रवासी भिसा पाएका छन् । अमेरिकी नागरिकका दाजुभाई दिदीबहिनीहरु ४ जनाले अमेरिकी दूतावास काठमाडौंबाट भिसा पाएका छन् ।
मार्चमा अमेरिकन नागरिकका बुबाआमा ९३ जना, एकबर्ष भन्दा लामो समय बसेका ग्रिनकार्डवाहकका लागि रिटर्निङ रेसिडेण्ट भिसा पाउने ३३ जना रहेका छन् । विदेशमा रहेका अमेरिकी सरकारका निश्चित कामदार वा पूर्व कामदारहरु ३ जनाले मार्चमा काठमाडौं दूतावासबाट आप्रवासी भिसा प्राप्त गरेका छन् ।
ट्रम्प प्रशासनबाट डाइभर्सिटी भिसामा लगाइएको रोक राष्ट्रपति जो बाइडेनले हटाएपनि काठमाडौं दूतावासले मार्चमा डाइभर्सिटी भिसा भने जारी गरेको छैन । बाइडेनले ट्रम्पको आप्रवासन रोक खारेज गरेपछि फेबु्रअरीको अन्तिम साताबाट काठमाडौंको दूतावासले सन् २०२१ का विजेताहरुलाई डाइभर्सिटी भिसा जारी गर्ने अपेक्षा गरिएको थियो । तर फेबु्रअरीमा पनि कुनै डिभी विजेतालाई भिसा दिइएन ।
मार्चमा विश्वका अधिकांश अमेरिकी दूतावास र कन्सुलेटबाट डाइभर्सिटी भिसा जारी नगरिएको अमेरिकी विदेश मन्त्रालय ब्यूरो अफ कन्सुलर अफेयर्सले जारी गरेको तथ्यांकमा देखिएको छ । विश्वभरबाट मार्चमा २० जनालाई मात्र डाइभर्सिटी भिसा जारी गरिएको तथ्यांकमा देखिएको छ । जसमा घानाका २ जना, अल्जेरियाका १७ जना र क्यामरुनका एकजना रहेका छन् ।
कोरोनाको महामारीका कारण अमेरिकी दूतावास काठमाडौंमा नियमित भिसा सेवा सुचारु भएको छैन । कहिलेदेखि सुचारु हुने भन्ने सन्दर्भमा पनि दूतावासले केही बताएको छैन । तर चरणबद्ध भिसा सुचारु गर्ने नियम अनुशार अरु कैयन श्रेणीमा भने सिमित संख्यामा भिसा जारी गरिएको छ ।
सन् २०२१ का लागि डिभी विजेता नेपालीहरुको संख्या भने ३८०१ रहेको छ । उनीहरुले गत अक्टोबर १ देखि भिसा पाउन सुरु गर्ने नियम भएपनि ट्रम्पको आप्रवासन रोकका कारण भिसा पाउनमा ढिलो भएको थियो । तर अहिले बाइडेन प्रशासनले रोक हटाउँदा पनि भिसा जारी नगर्नुले उनीहरुमा अन्यौल छाएको छ ।
सन् २०२१ का डिभी विजेताहरुले आगामी सेप्टेम्बरको अन्त्यसम्म भिसा पाइसक्नुपर्ने नियम रहेको छ । सन् २०२१ का डिभी विजेताहरुमा नेपाल एसियामा दोश्रो भएको छ ।
आर्थिक बर्ष २०२२ का गत अक्टोबर ७ देखि डिभीका लागि आवेदन खुलेकोमा नोभेम्बर १० सम्म डिभी लोटरी भरिएको थियो । यो डिभीको नतिजा भने सन् २०२१ को मे ८ मा सार्वजनिक हुनेछ ।
महामारी सुरुभए यताकै सबैभन्दा धेरै भिजिटर भिसा नविकरण
अमेरिकी दूतावास काठमाडौंले मार्चमा महामारी सुरु भएयताकै सबैभन्दा धेरैको भिजिटर भिसा नविकरण गरेको छ । गत मार्चको अन्तिमसातादेखि दूतावासमा नियमित भिसा सेवा सुचारु भएको छैन तर पनि दूतावासले विना अन्तरवार्ता भिजिटर भिसा भने नविकरण गरिरहेको छ ।
यो मार्चमा अमेरिकी दूतावास काठमाडौंले ७६१ जनाको भिजिटर भिसा नविकरण र जारी गरेको छ । सन् २०२० को मार्चको अन्तिमसाता महामारी बढेदेखि नै काठमाडौं दूतावासले यति धेरै भिजिटर भिसा नविकरण र जारी गरेको यो नै पहिलो पटक हो । अधिकांश भिजिटर भिसा नविकरण भएपनि आपतकालिन अवस्थामा अमेरिका भ्रमण गर्नुपर्ने अवस्था भएकाहरुका लागि नयाँ भिसा पनि जारी गरिएको जनाइएको छ ।
मार्चमा जारी ७६१ भिजिटर भिसामध्ये कतिजनालाई नयाँ भिसा जारी गरिएको हो र कतिजनाको भिसा नविकरण गरिएको हो भन्नेबारे पनि अमेरिकी विदेश मन्त्रालय ब्यूरो अफ कन्सुलरको तथ्यांकमा खुलाइएको छैन । यद्यपी अमेरिकी दूतावास काठमाडौंले आपतकालिन अवस्था र नविकरणबाहेक नियमित भिजिटर भिसा भने जारी गर्न सुरु गरेको छैन ।
काठमाडौं दूतावासले फेबु्रअरीमा ४९४ जनालाई, जनवरीमा ४१२ जनालाई, डिसेम्बरमा ५६७ जनालाई, नोभेम्बरमा १९६ जनालाई र अक्टोबरमा ४०४ जनालाई भिजिटर भिसा जारी गरेको थियो । त्यस्तै गत सेप्टेम्बरमा ७३ जनालाई र अगस्तमा १४४ जनालाई भिजिटर भिसा जारी गरेको थियो ।
जुलाई र मेमा भने काठमाडौंमा रहेको अमेरिकी दूतावासले कसैलाई पनि गैरआप्रवासी भिसा जारी गरेन । जुनमा ८ जनालाई र अप्रिलमा ९ जनालाई काठमाडौं दूतावासले भिजिटर भिसा जारी गरेको थियो । यसरी जारी गरिएका अधिकांश भिजिटर भिसा पहिले नै भिसा भएकाहरुलाई विना अन्तरवार्ता नविकरण गरिएका भिसा हुन् ।
मार्चमा कुन गैर आप्रवासी श्रेणीमा कतिलाई भिसा ?
सन् २०२१ को मार्चमा अमेरिकी दूतावास काठमाडौंले ६ जनालाई कुटनीतिक भिसा, १३ जनालाई क्रु मेम्बर भिसा, २० जनाालाई विद्यार्थी भिसा, २९ जना विद्यार्थीका डिपेन्डेन्टहरुलाई भिसा, अन्तर्राष्ट्रिय संगठनहरुमा काम गर्ने ९ जनालाई जी फोर भिसा, ७ जनालाई एचवानबी कामदार भिसा, कामदार भिसाका डिपेण्डेण्ट ९ जनालाई एचफोर भिसा जारी गरेको छ ।
त्यस्तै ७ जनालाई एक्सचेन्ज भिजिटर जे वान भिसा, उनीहरुका डिपेण्डेण्ट ५ जनालाई जे टु भिसा, अमेरिकी नागरिकका मंगेतर १० जनालाई के वा भिसा र एकजनालाई एम वान भिसा जारी गरेको छ ।