अमेरिका आउन खोज्ने कागजपत्रविहिन बढेपछि एरिजोना गभर्नरबाट सिमानामा संकटकालको घोषणा
प्रकाशित मिति : बैशाख ८, २०७८ बुधबार
सिमाक्षेत्रमा थामिनसक्नु कागजपत्रविहिनको भींड भएपछि एरिजोनाका गभर्नरबाट सिमानामा संकटकालको घोषणा गरिएको छ । रिपब्लिकन गभर्नर डग डुसीले सिमाक्षेत्रबाट गैरकानूनी प्रवेश बढ्नुमा राष्ट्रपति जो बाइडेनको दोष रहेको आरोप लगाउँदै राज्यका तर्फबाट २५० जना नेशनल गार्ड परिचालन गर्ने बताएका छन् ।
स्थानीय कानून कार्यान्वयन निकायलाई सहायताका लागि नेशनल गार्ड पठाइने भएको हो । स्थानीय कानून कार्यान्वयन निकाय र मेयरहरुले सहायताको आव्हान गरेपछि संकटकालिन अवस्थाको घोषणा गर्नुपरेको गभर्नर डुसीले बताए ।
सिमाक्षेत्रबाट अमेरिका प्रवेश गर्न खोज्ने कागत्रपत्रविहिनहरुको संख्यामा यो बर्ष उल्लेख्य बृद्धि भएपछि सिमाक्षेत्रमा संकटकालको घोषणा गर्ने एरिजोना पहिलो राज्य हो । मार्चमा मात्र सिमा सुरक्षा गस्तीले अमेरिका प्रवेश गर्न खोज्ने १ लाख ६८ हजार कागजपत्रविहिनलाई पक्राउ गरेको थियो । डिसेम्बरमा यो संख्या जम्मा ७१ हजार थियो ।
नेशनल गार्ड मिसनमा राज्यले २५ मिलियन फण्ड उपलब्ध गराउने गभर्नर डुसीले जानकारी दिएका छन् । तर उनले कहिलेसम्म नेशनल गार्ड परिचालन गर्ने भन्ने सन्दर्भमा केही बताएका छैनन् । डिपार्टमेन्ट अफ होमल्याण्ड सेक्युरिटीले पनि यसबारे केही बताएको छैन ।
टेक्सासले पनि सिमाक्षेत्रबाट प्रवेश गर्न खोज्ने आप्रवासीको संख्या बढेपछि गत महिना ५ सय नेशनल गार्ड परिचालन गरेको छ । तर टेक्सासका गभर्नरले संकटकालको भने घोषणा गरेका छैनन् ।
डोनाल्ड ट्रम्पले सन् २०१८ मा सिमाक्षेत्रमा हजारौं संघीय टुकडीहरु र नेशनल गार्ड परिचालनका लागि आदेश दिएका थिए । पछि ट्रम्पले सिमाक्षेत्रमा राष्ट्रिय संकटकालको घोषणा गरेका थिए । बाइडेन प्रशासनको माताहतमा पनि सिमाक्षेत्रमा टुकडीहरु कायम नै रहेका छन् ।
सिमानामा नेशनल गार्ड बराक ओबामा र जर्ज डब्ल्यु बुसका पालामा पनि परिचालन गरिएको थियो । एरिजोनाको टुकडीले कानून कार्यान्वयन अपरेशनमा सहभागिता जनाउने छैनन् । उनीहरुले हिराशतहरुमा मेडिकल अपरेशनमा सहायता गर्नेछन् । त्यस्तै राज्यबाट सिमाक्षेत्रमा संचालित बोर्डर क्यामेराको स्थापना, अनुगमन र कायम राख्नेछन् ।