रगतका थोपा जम्ने समस्यापछि अमेरिकाभर जोन्सन एण्ड जोन्सनको भ्याक्सिन वितरण स्थगित
भ्याक्सिन लगाएका व्यक्तिमा रगतका थोपा जम्ने समस्यापछि अमेरिकाको सेन्टर फर डिजिज कन्ट्रोल एण्ड प्रिभेन्सन सीडीसी र फुड एण्ड ड्रग एड्मीनिष्ट्रेशन एफडीएले अमेरिकाभर जोन्सन एण्ड जोन्सनको भ्याक्सिन वितरण स्थगित गरेका छन् । अमेरिकामा उक्त भ्याक्सिन लगाएका कम्तीमा ६ जनामा दुर्लभ र गम्भिर प्रकारको रगतका थोपा जम्ने समस्या पाइएपछि संघीय अधिकारीहरुले मंगलबार भ्याक्सिन वितरण स्थगित गरेका हुन् ।
सबै ६ वटा मामलाहरु १८ देखि ४८ बर्षभित्रका व्यक्तिमा भ्याक्सिन लगाएको ६ देखि १३ दिनभित्र देखिएको एफडीए र सीडीसीले जारी गरेको वक्तब्यमा जनाइएको छ । सीडीसीले पुनरावलोकनका लागि सल्लाहकार समितिको बैठक बुधबारका लागि बोलाएको छ । एफडीएले पनि अनुसन्धान जारी राख्ने भएको छ ।
अनुसन्धानको प्रकृया जारी रहुन्जेलसम्मका लागि सावधानीका लागि भ्याक्सिनको प्रयोग स्थगित गरिएको वक्तब्यमा उल्लेख छ । रगतका प्लेटलेसमा कम स्तरमा रगतका थोपा जमेको पाइएको एजेन्सीले जनाएको छ । त्यस्तो अवस्था आएमा उपचार कसरी गर्ने भन्ने सन्दर्भमा पनि अनुसन्धान भइरहेको छ ।
सामान्यतया रगत जम्ने समस्या आउँदा हेपारिन नामको औषधी दिनुपर्ने भएपनि यो अवस्थामा उक्त औषधी चलाउनु खतरापूर्ण रहेको जनाइएको छ । त्यसैले वैकल्पिक उपचार विधि अपनाउनुपर्ने संघीय एजेन्सीहरुले जनाएका छन् । रगत जम्ने समस्या दुर्लभ भएपनि जोन्सन एण्ड जोन्सनको भ्याक्सिन लगाएकाहरुमा तीनसाताभित्र पेट दुख्ने, असाध्यै टाउको दुख्ने, खुट्टा दुख्ने स्वास फेर्न गाह्रो हुने समस्या देखिएमा चिकित्सकसँग सम्पर्क गर्न सुझाव दिइएको छ ।
जोन्सन एण्ड जोन्सनले भने भ्याक्सिन लगाएका व्यक्तिका सबै प्रकारका रिपोर्टहरु आफूहरुले सार्वजनिक गर्ने बताउँदै अहिलेसम्म दुर्लभ प्रकारका त्यस्ता साइड इफेक्टहरु र भ्याक्सिनबीच कुनै स्पष्ट सम्बन्ध नरहेको बताएको छ । आफूहरुले विज्ञहरु र नियामकहरुसँग नजिकबाट काम गरिरहेको कम्पनीले जनाएको छ ।
रगतका थोपा जम्ने समस्या ४० को उमेरकी नेब्रास्का निवासी एकजना महिलामा जोन्सन एण्ड जोन्सनको भ्याक्सिन लगाएको दुईसातापछि देखिएको थियो । उनलाई नेब्रास्का मेडिकल सेन्टर ओमाहामा भर्ना गरिएको थियो । अहिले पनि ती महिलाको अस्पतालमा नै भइरहेको जनाइएको छ ।
