भ्याक्सिन लगाएकाहरुले अब न्युयोर्क आउँदा क्वारेन्टीनमा बस्न र परीक्षण गराउन नपर्ने
भ्याक्सिनको दोश्रो डोज लगाएकाहरुलाई अब न्युयोर्क आउँदा क्वारेन्टीन र परीक्षणको नियम नलाग्ने भएको छ । दुईवटा डोज लगाउनुपर्ने भ्याक्सिनको दोश्रो डोज लगाएको ९० दिन ननाघेकाहरुले न्युयोर्क आउँदा परीक्षण गराउने र क्वारेन्टीनमा बस्ने नियम पालना गर्नु नपर्ने भएको हो ।
भ्याक्सिन लगाएको ९० दिन नाघिसकेको भएमा भने उनीहरुले क्वारेन्टीन र परीक्षणको नियम मान्नुपर्ने गभर्नर एन्ड्रयु कुमोले जनाएका छन् । यो नियम अमेरिकाकै राज्यहरुबाट न्युयोर्क आउनेहरुको सन्दर्भमामात्र लागु हुनेछ । विदेशबाट अमेरिका आउनेहरुले भने अहिलेपनि १० दिन क्वारेन्टीनमा बस्नुपर्ने नियम रहेको छ ।
भ्याक्सिन नलगाएकाहरु वा दुईवटै डोज नलगाएकाहरुले भने अहिलेपनि विद्यमान क्वारेन्टीन र परीक्षणको नियम पालना गर्न अनिवार्य रहेको छ । अमेरिकाबाहिरबाट अमेरिका आउनेहरुले विमानमा चढ्नु अगाडि नै तीनदिनभित्रको कोरोना नेगेटिभ रिपोर्ट पेश गर्न आवश्यक छ ।
अहिलेसम्मको नियम अनुशार २४ घण्टाभन्दा बढी समयका लागि न्युयोर्कबाहिर जानेहरुले पनि फर्कदा तीनदिनभित्रको कोरोना नेगेटिभ रिपोर्ट पेश गनुपर्ने प्रावधान रहेको छ । साथै उनीहरु तीनदिनसम्म क्वारेन्टीनमा बसेपछि चौथो दिन पुन कोरोना परीक्षण गराउनुपर्नेछ । त्यसपछि रिपोर्ट नेगेटिभ आएमा उनीहरु तयसपछि क्वारेन्टीनमा बस्न आवश्यक छैन ।
तर पोजेटिभ आएमा भने उनीहरु १४ दिनसम्म क्वारेन्टीनमा बस्न आवश्यक छ । परीक्षण नीति न्युयोर्कसँग सिमा जोडिएका राज्यहरुका सन्दर्भमा भने लागु हुँदैन । नेगेटिभ कोरोना रिपोर्टसहित न्युयोर्क आउनेहरुले चौथो दिन पुन परीक्षण गराउन नचाहेको खण्डमा १० दिन क्वारेन्टीनमा बसेर निस्कन सक्नेछन् ।
