ग्रिनकार्ड लगायतका आवेदनमा युएससीआइएसका अधिकारीलाई तजविज अधिकार सुदृढ
प्रकाशित मिति : श्रावण १, २०७७ बिहीबार
ग्रिनकार्ड, वर्क परमिट लगायतका कैयन आवेदनमा युएससीआईएसका अधिकारीहरुलाई प्रदान गरिदै आएको तजविज अधिकार सहितको पुरानो नीति निर्देशिकालाई सुदृढ पारिएको युएससीआईएसले जनाएको छ । युएसीआईएसले आफ्नो नीति निर्देशिकामा तजविज अधिकार सम्बन्धि व्यवस्थालाई थप एकीकृत र सुदुढ बनाएर प्रकाशित गरेको छ ।
ग्रिनकार्ड र वर्क परमिट लगायतका आवेदनहरुमा आवेदकले आफ्नो योग्यता प्रमाणित गर्नुपर्ने अवस्था हुने भएकाले यदि आवेदकले विद्यमान कानुन अन्तरगत अस्वीकार्य (इनएड्मीसेवल) नभएको लगायतका योग्यताहरु पुरा गरेको खण्डमा र नकारात्मक तत्वको तुलनामा सकारात्मक तत्वहरु धेरै भएको खण्डमा अधिकारीले सकारात्मकरुपमा तजविज अधिकारको प्रयोग गर्नुपर्ने युएससीआईएसले स्पष्ट पारेको छ ।
नीति निर्देशिका विस्तारमा पढ्न यहाँ क्लीक गर्नुहोला ।
युएससीआईएसले अधिकारीहरुका लागि केस अनुशार तजविज अधिकार प्रयोग गर्दा ध्यान दिनुपर्ने तत्वहरुको सुची नै प्रकाशित गरेको छ । तजविज अधिकारको प्रयोग गरेर वर्क परमिट स्वीकृत गर्दा हरेक आवेदकको केसको तथ्य र अवस्थामा फरक हुने कुरालाई पनि नीति निर्देशिकामा व्याख्या गरिएको छ ।
युएससीआईएसका अधिकारीहरुलाई दिइएको यो तजविज अधिकारलाई अमेरिकाका चर्चित नेपाली कानुन व्यवसायी केशवराज सेडाईले अमेरिकी दूतावास वा कन्सुलेटमा गैर आप्रवासी भिसाका सन्दर्भमा कन्सुलेट अधिकारीलाई दिइएको तजविज अधिकारसँग तुलना गर्नुभएको छ । दूतावासमा भिसा जारी गर्दा कन्सुलेट अधिकारीलाई कैयन तजविज अधिकार दिइजस्तै युएससीआईएसका अधिकारीहरुलाई पनि ग्रिनकार्ड वा वर्क परमिट लगायतका कैयन आवेदनमा केहीहदसम्म तजविज अधिकार दिइएको सेडाईले बताउनुभयो ।
कहिलेकाँही ढिलो फाइल गरिएका भिसा थपका आवेदन वा सानातिना अपराध वा नकारात्मक तत्व भएका ग्रिनकार्डका आवेदन स्वीकृत गर्दा युएससीआईएसका अधिकारीहरुले तजविज अधिकार प्रयोग गर्ने गरेको सेडाईको भनाई छ । पब्लिक सुविधा लिएकाहरुको आवेदन स्वीकृत गर्नेदेखि मानवीय आधारमा आवेदन स्वीकृत गर्नेसम्मका तजविज अधिकार युएससीआईएसका अधिकारीहरुलाई हुने भएकाले त्यसलाई अझ व्यवस्थीत गरिएको उहाँले बताउनुभयो ।
आवेदनको समग्र अवस्था हेरेर केस अनुशार स्वीकृत गर्नसक्ने वा अस्वीकृत समेत गर्नसक्ने अधिकार हुने भएकाले यो नीति निर्देशिकाले तजबीज अधिकार प्रयोगका लागि युएससीआइएएसका अधिकारीहरुलाई प्रोत्साहन गरेको सेडाईले व्याख्या गर्नुभयो । तजविज अधिकारको प्रयोग गर्दा सधै आवेदनमा सकारात्मक परिणाममात्र आउने कुराको ग्यारेन्टी भने गर्न नसकिने उहाँले बताउनुभयो ।