मेक्सिको हुँदै अमेरिका छिर्न खोज्नेलाईमात्र ग्वाटेमाला, होण्डुरस र एल साल्भाडोर पठाइने
प्रकाशित मिति : मंसिर ३, २०७६ मंगलबार
अमेरिकी सरकारले आजदेखि कार्यान्वयनमा ल्याएको र आजै सार्वजनिक गरेको नयाँ नियम अनुशार मेक्सिको हुँदै अमेरिका छिर्न खोज्नेलाईमात्र ग्वाटेमाला, होण्डुरस र एल साल्भाडोर पठाइने स्पष्ट पारेको छ । नोभेम्बर १९ पछि विनाभिसा अमेरिकाको सिमाक्षेत्रमा आएका र सिमाक्षेत्रबाट अमेरिका छिरेका वा छिर्ने प्रयास गरेकाहरुका सन्दर्भमा मात्र यो नियम लागु हुने फेडरल रजिस्टरमा प्रकाशित नियममा स्पष्ट पारिएको छ ।
यसको मतलव अमेरिकामा भिसासहित प्रवेश गरेर युएससीआईएसमा सकारात्मक एसाइलम दावी गर्नेहरुलाई भने तेश्रो मुलुक पठाइने छैन । तर विना भिसा अमेरिकी सिमाक्षेत्रमा आएर एसाइलम दावी गर्नेहरुलाई भने ग्वाटेमाला, होण्डुरस र एल साल्भाडोर पठाइने भएको छ ।
ती देशहरुसँग भएको सहमति अनुरुप अमेरिकामा एसाइलम गर्नेहरुलाई ती देशसँग बाँडिने भएको छ । यसबारे आज फेडरल रजिस्टरमा औपचारिक रुपमा नियम प्रकाशित गरिएको हो । नियम आजै अर्थात् नोभेम्बर १९ देखि कार्यान्वयनमा आएको छ ।
आप्रवासी अधिकारकर्मीहरुले अमेरिका र तीनदेशबीच भएको उक्त सहमतिको विरोध गरेका छन् । अमेरिकामा एसाइलम खोज्नेलाई तेश्रो देशमा पठाउने सहमति उचित नभएको उनीहरुको भनाई छ ।
नियमको पूर्ण पाठ यहाँ उपलब्ध छ ।
विगत ६ महिनामा भएका एसाइलमका दुई कडा नियमपछि यो नियम आएको हो । यसअगाडि अमेरिका आउने क्रममा बाटोमा पर्ने देशमा एसाइलम दावी गरेर अस्वीकृत नभएकाहरुलाई अमेरिकामा एसाइलम आवेदन दिन अयोग्य बनाउने नियम आएको थियो । त्यस्तै अमेरिकी सिमाक्षेत्रमा आएर एसाइलम दावी गर्नेहरुले अदालती सुनुवाईसम्मका लागि मेक्सिकोमा नै प्रतिक्षा गर्नुपर्ने नियम लागु गरिएको थियो ।
अमेरिकामा ९ लाख ८७ हजार १ सय ९८ एसाइलमका आवेदनहरुको ब्याकलग रहेको र एउटा एसाइलमको मुद्दा टुंगो लाग्न ८१६ दिन लाग्ने गरेकाले एसाइलमको भार कम गर्न नयाँ नियम ल्याइएको जनाइएको छ । जसमध्ये ४ लाख ७४ हजार ३ सय २७ एसाइलमका मुद्दाहरु अध्यागमन अदालतमा रहेका छन् । आर्थिक बर्ष सन् २०१९ को सेप्टेम्बर अन्त्यसम्म युएससीआईएसमा ३ लाख ४० हजार ८ सय आवदेनको ब्याकलग रहेको फेडरल नोटिसमा उल्लेख छ ।