नेपालका दिनेश शर्माले अमेरिकामा जिते स्वर्ण
प्रकाशित मिति : कार्तिक १९, २०७६ मंगलबार
अमेरिकाको न्यू जर्सीमा सम्पन्न अन्तर्राष्ट्रिय मार्सल आर्ट खेलमा नेपालका दिनेश शर्माले स्वर्ण पदक जितेका छन् । सिनियर उमेर समूहको फाइनलमा शर्माले अमेरिकाका एण्ड्रिउ सुतेलाई ५—४ ले पराजित गर्दै स्वर्ण जितेका हुन् । न्यू जर्सीमा अक्टोबर २५ देखि २७ सम्म भएको प्रतियोगितामा स्वर्ण जितेका शर्मा नेपाल राष्ट्रिय मार्सल आर्ट गेम्स महासंघका महासचिव हुन् ।
शर्माले मार्शल आर्टको प्रसिद्ध अन्तर्रा्ष्ट्रिय अवार्डसमेत हात पारेका छन् । अमेरिकामा प्रत्येक वर्ष आयोजना हुने लिजेन्ड अफ दि मार्शल आर्ट हल अफ फेममा शर्मालाई ‘एक्ट्रा अर्डिनरी मास्टर ईन्ट्रक्टर’ अवार्डबाट सम्मान गरिएको हो । मार्सल आर्टको विभिन्न विधामा विश्वभरिबाट छनोट भएका प्रशिक्षक, मास्टर र ग्राण्ड मास्टरमध्ये एकलाई प्रदान गरिने उक्त सम्मान शर्माले पाएका हुन् ।
मार्शल आर्टस्को विकास र विस्तारमा आर्थिक र प्राविधिकरुपमा लागि परीरहेका शर्मा ब्राजिलमा भर्खरै सम्पन्न विश्व कराते प्रतियोगिताको समापनमा गोल्ड मेडल एवं एप्रिसेसन अवार्डले सम्मानीत समेत भएका थिए । उक्त प्रतियोगितामा शर्माका खेलाडी राजकुमार दरैले कास्य पदक जित्न सफल भएका थिए ।
शर्माले यसअघि नै सन् २०१५ मा अमेरीकामै मास्टर अफ द इयर अवार्ड तथा बेस्ट रेफ्रि अवार्डद्धारा सम्मानीत भईसकेका छन् । उनले विभिन्न समयमा बेलायत, जर्मनी, भारतबाट समेत अन्तर्राष्ट्रिय अवार्डले सम्मानीत भई सकेका छन् । नेपालमा मार्शल आर्टस्को चर्चित कोच शर्माले खेलकुद मन्त्रालय, राष्ट्रिय खेलकुद परिषद लगायतका विभिन्न सरकारी एवं खेलसंघहरुबाट दर्जनौं पटक सम्मानीत भई सकेका छन् । तेक्वान्दोका अन्तर्राष्ट्रिय ए क्लासका एम्पायर एवं प्रशिक्षक शर्मा एशियन मार्शल आर्टस् गेम्स कमिटीका महासचिव समेत हुन् ।