संविधान मस्यौदा समिति र बार एशोसिएशनमा काम गर्नुभएकी वकिल गुरुङ एनआरएनए बोर्ड सदस्यमा उम्मेदवार
प्रकाशित मिति : बैशाख २७, २०७६ शुक्रबार
नेपालमा लामो समय मानव अधिकार र कानूनी क्षेत्रमा काम गरीसकेकी अधिकारकर्मी एवं कानूनविद् छत्रकुमारी गुरुङले एनआरएनएको हितमा आफ्नो कार्यदक्षता लगाउने बताउनुभएको छ । उहाँले एनआरएएनए अमेरिकाको निर्वाचनमा बोर्ड अफ डाइरेक्टर पदमा उम्मेदवारी दिनुभएको छ ।
नेपालमा लामो समय मानव अधिकार र कानूनी क्षेत्रमा काम गरिसक्नुभएकी गुरुङले आफ्नो योग्यता, दक्षता र अनुभवलाई एनआरएनको समग्र हितमा लगाउँन उम्मेदवारी दिएको बताउनुभयो । यसैगरी उहाँले सबल, सक्षम र समावेशी एनआरएन बनाउनका लागि पनि आफूले उम्मेदवारी दिएको प्रष्ट पार्नुभयो ।
गुरुङले नेपालको अन्तरिम संविधान मस्यौदा समितिको सदस्यसमेत रहेर संविधान लेखनमा महत्वपूर्ण भूमिका निर्वाह गर्नुभएको छ । यसअघि एनआरएन अमेरिकाको महिला समिति र विधान समितिमासमेत रहेर काम गर्नुभएको थियो ।
विगत एघार बर्षदेखि अमेरिकाको न्यूह्यामसर राज्यमा बस्दै आउनुभएकी गुरुङले न्यूह्यामसर नेपाली समाज, अन्तर्राष्ट्रिय साहित्य समाज न्यूह्यामसर, एभरेष्ट लायन्स क्लव न्यूह्यामसर र गुरुङ समाज न्यूह्यामसरलगायतका दर्जनौं संघसंस्थामा विभिन्न पदमा रहेर कामको अनुभव संगालीसक्नुभएको छ ।
नेपाली कानून व्यवसायिहरुको छाता संगठन नेपाल बार एशोसिएशनको पूर्व केन्द्रिय सदस्य एवं सर्वोच्च अदालतमा वकिलसमेत रहेर काम गर्नुभएकी गुरुङ कानूनी सहयोग तथा परामर्श केन्द्र नेपाल र जनजाति महिला कानूनी सचेतना समूहको संस्थापक अध्यक्षसमेत हुनुहुन्छ ।