जापानको एक विश्वविद्यालयबाट बार्षिक ७ सय विदेशी विद्यार्थी सम्पर्कविहिन
प्रकाशित मिति : चैत्र १, २०७५ शुक्रबार
टोकियोस्थित एक विश्वविद्यालयबाट बर्षिक ७ सय विदेशी विद्यार्थीहरु पढाई सकिनुअगावै विद्यालयको सम्पर्कबाहिर रहनेगरेको तथ्य सार्वजनिक भएको छ । जापान न्यूज नेटवर्क (जेएनएन) ले हालसालै सार्वजनिक गरेको एक रिपोर्टमा विदेशी विद्यार्थीहरुको बर्चश्व रहेको ‘टोकियो फुकुसी दाइगाकु’बाट शैक्षिक अवधी पूरा नहुँदै विदेशी विद्यार्थीहरु बाहिरिनेगरेको तथ्य उजागर भएको हो ।
नयाँ शैक्षिक सत्र सुरु हुने समयमा रहेका विदेशी विद्यार्थीहरु दिक्षित हुने समयसम्ममा एक तिहाईका दरले घट्ने गरको रिपोर्टमा जनाइएको छ ।
विदेशी विद्यार्थीहरु यसरी सम्पर्क विहिन हुने घटनालाई गम्भिर रुपमा लिएको बताउँदै सम्बन्धित मन्त्रालयहरुले सम्पर्कविहिन बनेका विद्यार्थीहरुको सर्वेक्षण तथा खोजतलास गर्ने समेत बताईएको छ ।
टोकियोको ईकेबुकुरो, गुन्माकेनको ईसेसाकी लगायतका विभिन्न स्थानहरुमा सो विश्वविद्यालय मातहतका विभिन्न क्याम्पसहरु छन् जसमा झण्डै ५ हजार जना विद्यार्थीहरु पढ्ने गरेका छन् । ति क्यम्पसहरुमा जापानी भाषा, प्राविधिक शिक्षा तथा विश्वविद्यालको पाठ्यक्रमको पढाई हुने गर्दछ ।
जेएनएनले भियतनाम तथा नेपाल लगायतका मुलुकहरुबाट आएका २७ सय विद्यार्थीहरु मध्ये ७ सय जनाको प्रमाणिकरण हुन नसकेको सक्कली कागजातको अध्ययन गरेको थियो । अनुसन्धान विद्यार्थीका रुपमा सो कलेज छिरि अध्ययन गरिएको समेत बताइएको छ ।
त्यहाँ अध्ययनरत विद्यार्थीहरुसंग अन्तवार्ता गरि थप जानकारी लिइएको र विद्यार्थीहरुसंगको अन्तवार्तामा पनि सुरुको समयमा र अन्तिमसम्म विद्यार्थी संख्यामा व्यापक गिरावट आउने गरेको पुष्टी भएको उल्लेख छ ।
टोकियो फुकुसी दाइगाकुमा अध्यनरत विद्यार्थीहरुको संख्या वासेदा विश्वविद्यालय पछाडीको ठूलो संख्या हो ।