नक्कली कागजात सहित कलाकार भिसा फाइल गरिदिनेलाई न्युयोर्कमा १० बर्ष जेल
प्रकाशित मिति : फाल्गुन २२, २०७५ बुधबार
नक्कली कागजातहरु तयार गरेर कलाकारका लागि पी थ्री भिसा फाइल गरिदिएको अभियोगमा न्युयोर्कको एउटा गैर नाफामुलक संगीत संस्थाको नेतृत्व फन्दामा परेको छ । बु्रकलिनको संघीय अदालतमा चलेको मुद्दामा उनीहरु आफूहरु दोषी रहेको स्वीकार गरेका छन् ।
क्वीन्सको रिगोपार्कमा रहेको एप्पल म्युजिक अवार्ड फाउण्डेशन इन्कका संचालकले आफूहरुले भिसामा जालसाजी गरेको स्वीकार गरेका हुन् । सन् २०१३ को जनवरीदेखि सन् २०१४ को डिसेम्बरसम्म स्टेला बोयादजियान र उनको समुहले नक्कली कागजात बनाएर पी थ्री भिसामा कैयन व्यक्तिलाई अमेरिका ल्याएका थिए ।
परम्परागत कलाका प्रस्तुतकर्ता र सांस्कृतिक रुपमा अद्धितीय रहेको भन्दै उनीहरुले कैयनका लागि १० हजार डलरसम्म लिएर पी थ्री भिसा फाइल गरिदिएको जनाइएको छ । उनीहरुले नक्कली नृत्यका प्रमाणपत्रहरु समेत पेश गरेको जनाइएको छ । अमेरिकामा आइसकेपछि भिसा प्राप्त गर्नेहरुले भिसाको अवधि थप्न अतिरिक्त रकम समेत बुझाउने गरेका थिए ।
स्टेलालाई १० बर्षको कैद सजाय र परिचय चोरेको आरोपमा २ बर्षको अनिवार्य जेल सजाय हुने जनाइएको छ ।